මී උගුලකට හසුවී පණපිටින් සිටි මීයකු මරා ගත නොහැකිව ගෙහිමියා ළතැවෙද්දී අල්ලපු ගෙදර බළලා පැමිණ මීයත් උගුලත් දෙකම රැගෙන ගියාලූ.

මී උවදුර වළක්වා ගැනීම සඳහා ගෙහිමියා විසින් පසුගිය දිනක රාත‍්‍රියේ සිය නිවෙසෙහි මී කතුරක් අටවන ලදී. මේ සඳහා ඇමට භාවිත කලේ පුළුස්සන ලද පොල් කැබැල්ලකි.

පොල් කැබැල්ලේ පිහිටෙන් පළමු දිනයේම උගුලට මීයකු හසුවී සිටින අයුරු ගෙහිමියාට එදින රාත‍්‍රියේදීම දැකගත හැකිවී තිබිණි. තමන්ට මෙතෙක් කරදරයක්ව සිටි මීයකු උගුලට හසුවී සිටීම ගෙහිමියාට සතුටක් ගෙන දෙන්නක් වුවද මෙහිදී ඔහුගේ දුකට හේතුවන කාරණයක් ද සිදුවී තිබුණි. එනම් මීයා උගුලට හසුවී තිබුණේ උගේ වලිගයෙනි. මේ නිසා මීයා මිය ගොස් සිටියේ නැත. ගෙහිමියාගේ දුකට හේතුව එය විය.

ඒ මේ අත දඟලන මීයා මරා දැමීමට ද ගෙහිමියාට හිතක් නැත. එසේ කියා මීයා නිදහස් කිරීමට ද බැරිය. ඒ අනුව ඔහු මෙම ගැටලූව නිදා සිටි සිය බිරියට දන්වා සිටියේය.

”ඔය ගැන ඔච්චර හිතන්න දෙයක් නෑ අනේ. ඔන්න ඔය මීයා කතුරත් එක්කම මිදුලෙන් තියල ඔයා ගෙට ඇවිත් නිදාගන්න. උදේට බලමු මොකක්ද කරන්න  ඕනෑ කියල. නිදි මරගාතෙම වුවද බිරියගේ කීම ඔහුට මහත් අස්වැසිල්ලක් විය. ඒ අනුව ගෙහිමියා බිරියගේ කීමට අවනතව කටයුතු කළේය.

පසු දිනට උදාවිය. ගෙහිමියාට මීයා සමග උගුල මතක්විය. ඔහු වහාම තමන් එය තිබූ තැනට ගොස් විපරම් කළේය. නමුත් එතැන මීයකු තියා උගුලවත් පෙනෙන්නට නැත. කලබලවූ ඔහු ඒ බවද බිරියට දන්වා සිටියේය.

”මීය නම් මන්ද මෙන්න කතුර නම් තියෙනවා. මට මේක ටිකකට ඉස්සෙල්ල ගෙනත් දුන්නෙ අල්ලපු ගෙදර නංගි. එයාලගේ බළල තමයි දඩයම කරල තියෙන්නෙ.” බිරිය සිනාසී එසේ කියන විට ”ඒ කියන්නෙ බළල මීයයි කතුරයි දෙකම අරගෙන ගිහින්.” ගෙහිමියාද සිනාසී බිරියට එසේ කීවේය.