දිනය මාරු වී මංගල සාදයකට ගිය අරණායක ප‍්‍රදේශයේ තරුණයකුට තමා රැගෙන ගිය වටිනා ත්‍යාගයත්, දවල් කෑමත් නොමැතිව ආපසු එන්නට සිදු වූ පුවතක් කඳුරටින් වාර්තා වේ. තම ඥාති මංගල සාදයකට වටිනා ත්‍යාගයකුත් රැගෙන ජැන්ඩියට ඇඳ පැළඳගත් අදාල තරුණයා මංගල සාදය පැවති සාද නිකේතනයට ගොස් එහි සිටි ත්‍යාග භාර ගැනීමේ ආරක්‍ෂක නිලධාරියාට ත්‍යාග පාර්සලය බාර කර සාදය පැවති ශාලාව වෙත ගියද තමන් දන්නා හඳුනන කිසිවකු එහි නොසිටි නිසා පිළිගැනීමේ බීම වීදුරුවක් පානය කරන ගමන් තම ඥාති හිතවතකුට දුරකථන ඇමතුමක් ලබා දුන්නේ සාදයේ කොතැනක හෝ ඔහු හා තම ඥාතීන් සිටිත්දැයි දැන ගැනීමටය. සිදු වී තිබෙන්නේ සුළුපටු අකරතැබ්බයක් නොවන බව ඔහුට වැටහුණේ තම හිතවතා දුන් උත්තරයත් සමගය. ඔහු ඒ වන විටත් තම රැුකියාවේ නිරත වී සිටියේය. ඔහු එදින සවස නිවෙසට එන බව පැවසූවේ මංගල සාදය හෙට තිබෙන නිසාය. කිසිවක් කර කියා ගත නොහැකි තරුණයාට හීන් දාදිය දැම්මේය. ත්‍යාගය ආපසු ගැනීමටද නොහැකිය. හෙට මංගල සාදයට ද ත්‍යාගයක් අතැතිව පැමිණිය යුතුව ඇත. හෙමින් සීරුවේ දහවල් ආහාරයද නොගෙන එතැනින් ඉවත් වූ තරුණයා කිසිවක් නොදන්නා අයකුමෙන් නිවෙසට ආවේය. පුදුමයකි. ඉඳහිට එන දුරකථන ඇමතුම් කීපයක් නිසා ඔහු තක්කු මුක්කු විය. එම දුරකථන ඇමතුම්වලින් ඇසුණේ මගුල්ගෙයක් තියනවා යමුද කියාය. කෙසේ හෝ කනින් කොනින් ප‍්‍රදේශය පුරාම මේ සිදුවීම ආරංචි වී ඇති බව ඔහු දැනගත්තේ මේ දුරකථන ඇමතුම්වලිනි.