නිවසේ වහල විනාශ කරන වඳුරන් බිමට ඇද වැටීමට උගුලක් අටවන්න ගොස් බාගෙට කැපූ අඹ අත්තක් වහලට වැටී උළු කැට බිඳීම නිසා උරණ වූ බිරිය සැමියාට කොසු පහරදීමේ සිද්ධියක් දකුණු පළාතේ ප්‍රකට නගරයකට ආසන්න ගමකින් වාර්තාවේ. 

මොහු ප්‍රකට සංචාරක හෝටලයක වැඩ පරීක්ෂකවරයකු ලෙස සේවය කරන අතර  බිරිය ද මූල්‍ය ආයතනයක ක්ෂේත්‍ර නිලධාරිනියකි. නිවෙසේ වහලට නිතර නිතර වඳුරන් පැනීම නිසා වහලේ  උළු කැට බිඳි නිවස ඇතුළ තෙමෙන්නට විය. බිඳුණු උළු කැට වෙනුවට අලුතෙන් උළු කැට දැමිම මහත් හිසරදයක් විය. මේ පිළිබඳව බිරිය දොස් පැවරුවේ සැමියාටය.

වඳුරෝ පැනල වහල කඩනවා. මේ විදියට උළු කැට දාන්න ගියොත් හම්බ කරන පඩිය මදි ඔයා ඉතිං වැඩකරයා වුණාට මේ වඳුරන්ගෙන් වහල බේර ගන්න මුකුත් කළේ නැහැ. පිරිමි කමටත් ලැජ්ජයි. මුකුත් කරන්න බැරිනම් වඳුරන් වහලට පනින අඹ ගහවක් කපා දමන්න බිරිය චෝදනා මුඛයෙන් කතා කළා. 

හරි හරි ඔයා කලබල වෙන්න එපා. හෙට මගේ ඔෆ් ඬේ එක. ඕකට මම හොඳ උගුලක් අටවන්නම්. සැමියා වීරයකු මෙන් කීවේ බිරියට සෙකන්ඞ් නොවීමටය. 

අනේ ඔයාගෙ උගුල්. අම්මාගෙ හත් දවසේ දානෙ තටුවට තියපු බැදපු මාළු කෑල්ලත් බයිට් එකට ගත්ත මිනිහ නොවැ. බිරිය හින්ට් එකක් අරිමින් කීවාය. 

පසුවදා උදේ බිරිය සේවයට ගිය පසු සැමියා වහලට පනින වඳුරන් බිමට ඇද වැටෙන අයුරින් වහල උඩ තිබු අඹ අත්ත බාගෙට කපා තැබුවේය. 

බිරිය සවස සේවය නිමවා නිවෙසට පැමිණ ටික වේලාවක් ගත වෙද්දී වඳුරෝ රංචුවක්ම ඈත සිට පැමිණියහ. 

ඔන්න අද මගේ වැඩ බලා ගන්න පුළුවන්. අද තමයි වඳුරෝ හොඳ පඩමක් ඉගෙන ගන්නේ සැමියා උජාරුවෙන් කීවේය. 

ගත වුයේ ස්වල්ප වෙලාවකි. වඳුරන් අඹ අත්තට පනිනවත් සමග අඹ අත්ත කඩාගෙන වහලට වැටුණි. වඳුරෝ රංචුව වෙනත් අත්තකින් වහලට පැන දිව ගියහ. අඹ අත්ත වැටීම නිසා වහලේ උළු කැට විශාල ප්‍රමාණයක් බිඳී විනාශ විය. 

මේකම ඕයි තමුසේ අටවපු උගුල. ඇඟේ හැටියට මොළයවත් නැහැ. පලනව තමුසෙගෙ තට්ටේ කියමින් බිරිය ළඟ තිබූ කොස්ස කැඩෙනතුරු සැමියාට පහර දුන්නාය. 

වඳුරන්ට අටවපු උගුලෙ මමම වැටුණා යැයි කියමින් සැමියා දස අතේ කල්පනා කරන්නට වූයේ නැවතත් ඔවැනි මෝඩ වැඩ නොකරන්නට වගබලා ගන්නා බව කියමිණි. 
(බළපිටියේ එස්.ඒ.වයි. ද සිල්වා)