(ගම්පහ - තිලකරත්න දිසානායක)
සති අන්තක දිනෙක මිතුරන් සමඟ හොඳ මාළු බැදුමක්ද සමගින් ආහාර වේලක රස බැලීමට සිතා පොකුණු ආශ්‍රිතව ඇති කරනු ලබන මාළුන් තිදෙනෙකු මිලට ගත් පුද්ගලයකුට නිවස බලා එමින් සිටියදී මාළුන් ජලාශයකට දැමීමට සිදුවීමේ සිද්ධියක් ගම්පහට නුදුරු ප්‍රදේශයකින් අසන්නට ලැබිණි.

  සිද්ධිය මෙසේය.

පොකුණක ඇති කරන මාළුන් එම මොහොතේදීම අල්ලා දෙනු ලබන බැවින් ඉතා රසවත් බව දැනගන්නට ලැබීම මත පුද්ගලයෙකු සතිඅන්ත දිනෙක මිතුරන් සමඟ ආහාර වේලක රස බැලීමට සිතා අදාළ මාළු පොකුණ වෙත ගොස් විශාල ප්‍රමාණයේ මාළුන් තිදෙනෙකු මිලට ගෙන ඇත. 

  එක් මාළුවෙකු රුපියල් 400ක් වූයෙන් රුපියල් 1200ක් ගෙවා ලබාගත් මාළුන් තිදෙනා බෑගයක දමා දී ඇති අතර හනික නිවෙස බලා පැමිණ ඇත්තේ ඉක්මණින් මාළු බැදුමක් සහ මාළුවක් පිසීම සඳහාය. 

  මඳ දුරක් එනවිට බෑගය තුළ සිටි මාළුන් ඉතා වේගයෙන් දඟලන්නට වූයෙන් ඔහු එය විවරකොට බලා ඇත්තේ කරන්නේ කුමක්දැයි සිතාගත නොහැකිවය. 

  මාළු ඇතිකරන්නා විසින් පොකුණෙන් ගෙන තමන්ට ලබාදුන් මාළුන් තිදෙනාම පණ පිටින් දඟලනු දුටු ඔහුට විශාල කනගාටුවක් දැනී ඇති බැවින් කරන්නේ කුමක්දැයි සිතාගත නොහැකිව වටපිට විපරම් කරද්දී දැකගැනීමට හැකිව ඇත්තේ මේ දිනවල වර්ෂාවෙන් පිරීගිය කුඩා ජලාශයක් වැනි ස්ථානයකි. 

  මිතුරන් සමඟ දිවා ආහාරය ගැනීම පිණිස කඩිනමින් නිවස බලා යමින් සිටි හෙතෙම ජලය පිරී තිබූ ස්ථානයට දිව ගොස් මාළු තිදෙනා ජලයට මුදාහැර ඇති අතර මාළුන් ක්ෂණයකින් වරල් ගසමින් නොපෙනී යද්දී ඔහුට නොදැනීම දෙනෙතින් කඳුළු බිදු කිහියක් රූරා වැටෙන අයුරු මෙම සිදුවීම බලා සිටි අයෙකුට දැකගැනීමට හැකිව ඇත.