වයඹ පළාතේ උප නගරයක වූ මාළු වෙළෙඳසලකි. උදේ පාන්දර නිසා විශාල පිරිසක් මාළු මිලදී ගැනීමට එක් රැස්ව සිටියහ. මනා පෙනුමැති තරුණයකු ජීප් රථයෙන් බැස ආවේ මාළු මිලදී ගැනීමටය. සේවකයා ඔහුගේ ඉල්ලීම පරිදි බළ මාළු කිලෝවක් කපා දී ”රුපියල් හාරසිය හැටක් ගෙවන්නැ”යි කීවේය. ඔහු මුදල් පසුම්බියෙන් මුදල් අදින අතරේ මුදලාලි සේවකයාට සමීපවී රහසින් කීවේ මේ අලූතින් ළඟ පොලිසියට පත්ව ආ ස්ථානාධිපති බවකි. සේවකයා සිනාසී ”මහත්තය හාරසියයක් ගෙව්වම ඇති” කීවේය. ”ඉතිං රුපියල් හැටක් පාඩුයිනෙ” ස්ථානාධිපති කියත්ම මුදලාලිද කීවේ ”නෑ... නෑ... ඇති” කියාය. එවිට පොලිස් ස්ථානාධිපති මාළු මිලදී ගැනීමට ආ පිරිස දෙස බලා ”ඔය ගොල්ලත් බළ මාළු ගන්නවනම් කිලෝවකට රුපියල් හාරසීයට වඩා ගෙවන්න එපා. පන්සීය නම් රුපියල් දෙසියයි හරිද?” කීවෙන් මුදලාලිට දෙවියන් සිහිවුණාලූ.