පැනිබීම බෝතලයක් පානය කිරීමෙන් පසු සිය බිරිය වෙනත් පුරුෂයකු සමග පැනයාමේ සිද්ධියක් ඉකුත් දා කොළඹ සිට මොනරාගල දක්වා ධාවනය වූ පෞද්ගලික බසයකින් වාර්තා වේ. තිස් එක් හැවිරිදි ඔහු නාවික හමුදා සෙබළෙකි. මීට වසර දෙකකට පමණ ඉහතදී නුගේගොඩ පදිංචි තරුණියක සමග විවාහ විය. මේ අතර ඇය දරුවකු ලැබීමට සිටියාය. ඒ සඳහා වෛද්‍යවරයකුට පෙන්වීමට දෙදෙනාම කොළඹ ගියහ. එම කටයුත්ත අවසානයේ මොනරාගල පදිංචි නිවෙස වෙත යාමට ඔවුන් කොළඹ කොටුවට පැමිණ බසයකට ගොඩ විය. ඊට පෙර අසල වෙළෙඳසලකින් පැනි බීම බෝතලයක් ද මිලදී ගත්තේය. ටික දුරක් ගමන් කරන විට බිරියගේ වෙනසක් නාවික සෙබළාට පෙනුණි. ඇය වෙනත් පුද්ගලයකුට යම් සංඥාවක් ලබාදෙන බව පෙණුනත් ඔහු ඒ ගැන වැඩි තැකීමක් නොකළේය. අතරමඟදී බසය තේ පානය කිරීම සඳහා නතර කෙරිණි. ඒ පරකඩුව ප‍්‍රදේශයේදිය. තමාට වැසිකිළියට යාමට අවශ්‍ය බව බිරිය පැවසීම නිසා ඔහු ඇය සමග ඒ සඳහා බසයෙන් බැස්සේය. ඉන්පසු නැවත පැමිණ අසුනේ තබා තිබූ කොළඹ කොටුවෙන් මිලදී ගත් පැනි බීම බෝතලය පානය කර ඇත. ඉන්පසු නාවික සෙබළාට නින්ද ගොස් තිබෙන බව පොලීසිය කියයි. පසුව පියවි සිහිය ලැබී බලන විට බිරිය හෝ පෙර කී පුද්ගලයා බසය තුළ නොසිට ඇත. ඇය ඔහු සමග පැන යන්නට ඇති බවට ඔහු පොලිසිය වෙත ප‍්‍රකාශ කොට තිබේ. කෙසේ වෙතත් නාවික සෙබළා වැලිගම පදිංචි සිය මාමා කෙනකු මාර්ගයෙන් මාතර මහ රෝහල වෙත ඇතුළත්ව මේ වන විට එහි ප‍්‍රතිකාර ලබමින් සිටී. මොනරාගල පොලීසිය මේ සම්බන්ධව වැඩිදුර පරීක්ෂණ මෙහෙයවයි.