සොරුන්ගේ උපායකට හසුවීමට ගිය පෙදරේරුවකු සිය ස්ථානෝචිත ප‍්‍රඥාව යොදා බේරුණු පුවතක් සියනෑවෙන් ඇසුණි. ඔහු ඉදිකිරීමේ කටයුත්තෙහි දක්ෂයෙකි. එනිසාම සෑම ප‍්‍රදේශයකින්ම ඔහුගේ සේවය බලාපොරොත්තුවෙන් බොහෝ දෙනා ඔහුට වැඩ පැවරූහ. මෙනිසාම දිනෙන් දින දියුණුවට පත්වූ ඔහු හොඳින් හැඳ පැළඳ කටයුතු කළ අතර ගෝලබාලයන්ටද හොඳින් සැලකුවේය. මේ ආකාරයෙන් දිනෙන් දින දියුණුවන මොහු කොල්ලකරුවන් කිහිප දෙනෙකුගේ ඉලක්කයක් වූයේ අසල්වැසි අයෙකුගේ ඔත්තුවකටය. බාස් උන්නැහේ... බාස් උන්නැහේ.. දිනක් රාත‍්‍රියේ අයකු කතා කරන හඬ ඇසුණි. කවුද...? ඔහු ඇතුළේ සිටම ඇසීය. මේ බාස් උන්නැහේ ගිය සතියේ වැඩ කරපු තැනක දාලා ගිය බඩු ටික ගෙනාවා. දොර ටිකක් අරිනවද? කටහඬ නුපුරුදුය. වහා යතුරු සිදුරෙන් බැලීය. පුද්ගලයා හෙල්මටයක් පැළැඳ යතුරු පැදි ජැකට්ටුවක්ද ඇඳ සිටී. වහා සිය ගෙලෙහි තිබූ පවුමක පමණ රන්මාලය ගලවා ආරක්ෂිත තැනකින් තැබුවේය. නිමල්, විමලේ, මහින්ද, සිරිපාල නැගිටපල්ලා. අන්න අර මහත්තයා බඩු ටික ගෙනල්ලා. ගිහිං ඒ ටික බා ගත්ත නම්. උස් හඬින් එසේ කියමින් තමා පමණක් සිටි නිවසේ තවත් ගෝලයින් සිටිනා බව එළියේ සිටි අයට ඇඟවීය. ගතවූයේ සුළු මොහොතකි. සැණෙකින් යතුරු පැදියක් පණ ගන්වා වේගයෙන් පිටව යන හඬක් එළියෙන් ඇසුණි.