පදමට  මත්  වූ  මිතුරන්   දෙදෙනෙක්   මාතර   බලා  යාමට  ඉකුත් 20  දා   රාත්‍රී   කොට්ටාව   මාකුඹුර   අධිවේගී බස්   නැවතුම්පොළට පැමිණ   ඔවුන් රැගෙන  ආ බඩු  පාර්සල්  මාතර  බස්  රථයකට දමා  ගාල්ල  බස්  රථයක  නැග  ගාල්ලට  යාමේ  පුවතක් මාකුඹුර  බස්  නැවතුම්පොළෙන්  වාර්තා  වෙයි.

මාතර ප්‍රදේශයේ පදිංචි පෙදරේරුවන් ලෙස රැකියාව  කරන අතර ඔවුන් මීට දින කීපයකට පෙර මෙහි එක් අයකුගේ හෝමාගම හල්බරාව ප්‍රදේශයේ පදිංචි දියණියගේ නිවසේ අලුත්වැඩියා කටයුත්තක් සඳහා පැමිණ ඇත. දින කීපයක්  නිවසේ වැඩ කර පසුගිය 20 වනදා රාත්‍රී නැවත ගමට  යාමට සුදානම් වී තිබේ. එම අවස්ථාවේ දියණිය විසින් රුපවාහිනී යන්ත්‍රයක්, ගෑස් ලිපක් ඇතුළු වටිනා භාණ්ඩ කීපයක් ගමට ගෙනයාම සඳහා  සුදානම් කර දී  ඇත. ඔහු  එම බඩු  පාර්සල්  රැගෙන තම  මිතුරා සමඟ  ත්‍රී රෝද රථයකින්  ඉකුත් (20) මාකුඹුර බස් නැවතුම් පොළට පැමිණ තිබේ. එහි පැමිණෙන අතරතුර මත්පැන්  බෝතලයක් රැගෙන  දෙදෙනා  මත්පැන්  පානය  කර  ඇත. පදමට මත්  වූ  ඔවුන් රාත්‍රී  8ට පමණ  බස්  නැවතුම් පොළට  පැමිණ රැගෙන  ආ  පාර්සල්  මාතර  බලා  යාමට  සුදානම්ව  තිබූ බස්රථයේ පාර්සල ගබඩා  කරන  ස්ථානයේ  ගබඩා කර එක් පුද්ගලයෙක්  සිගරැට්ටුවක්  රැගෙන  ඒම  සඳහා  පිටව ගොස්  ඇති  අතර  අනෙක්  පුද්ගලයා  බස්  රථය  තුළ  ඉඳගෙන තිබේ. පසුව    සිගරැට්ටුව  රැගෙන  ආ සගයා ද  ඔහු අසලින්ම  ඉඳගෙන  ඇත. අනතුරුව  බස්  රථය ගමන්  ආරම්භ  කර  ඇති අතර   අතරමග දී බස්  රථයේ   කොන්දොස්තර  මහතා  ටිකට්  පත  ලබා දී  ඇත. ටිකට්  පතේ  ගාල්ල  යනුවෙන්  සටහන්  වී   තිබීම  නිසා  දෙදෙනාටම  දෙයියෝ  සිහි  වී  ඇත.

පසු දින ඔහුගේ හිතවතෙකු මාර්ගයෙන් මාකුඹුර අධිවේගී බස් නැවතුම්පොළේ නිලධාරියෙකුට මේ පිළිබඳව දැනුම් දීමෙන් අනතුරුව එහි නිලධාරියා විසින් අදාළ බස් රථය සොයා එම පාර්සලය ලබාදීමට කටයුතු කර  තිබේ.
(හෝමාගම  ප්‍රියන්ත  ජයලත්)