(නාඋල - ඉන්දික අරුණ කුමාර)
රුපියල් හැටකට නාඋල නගරයෙන් මිලදී ගත් පොල් ගෙඩියක් නිවසට ගොස් බලන විට නරක්වීම හේතුවෙන් උරන වූ කාන්තාවක් රුපියල් පන්සීයක් වැයකර ත්‍රි රෝද රථයකින් පැමිණ අදාළ වෙළදසැලේ හිමිකරුට බැණ වැදීමේ සිද්ධියක් පසුගිය දා නාඋලින් වාර්තා විය.

හැමදාමත් බඩු ගන්නා වෙළඳසලෙන් සුපුරුදු පරිදි පොල් තෝරාගත් කාන්තාව කඩිමුඩියේ නාඋලින් කිලෝමීටර් ගණනක් දුර ප්‍රදේශයක පිහිටි සිය ගම්මානයට ගොස් ඇත්තේ රෑ බෝවීමට පෙරය.

ගමට ඇති එකම බස් රථයෙන් ගමට ගියද රාත්‍රි ආහාර වේල සැකසීමට යාමේ දී තමන් ගෙනා පොල් ගෙඩිය නරක් වී ඇති බව දැනගත් මේ කාන්තාවට ඉන්න තැනද අමතක වී තිබේ.

රෑ කඬේ වහන්නට පෙර නාඋල නගරයට යාමට බස් රථයක්ද නොමැතිකමින් ළඟම තිබෙන ත්‍රී රෝද රථයකින් පිම්මේ පැමිණි කාන්තාව කඩය ඉදිරිපිට කෑ ගසන හඩ ඇසී වෙළඳසැලේ සිටි පිරිස් ද එයට අවධානය යොමු කළහ.

“යකෝ මෙහෙමත් වැඩ කරනවද නරක්වෙච්ච පොල් විකුණන්න. දැනගන්නවා අපි බඩු ගන්නේ සල්ලි දීලා බලු වැඩ කරන්න එපා.

මේ පොල් ගෙඩිය තියාගන්නවා. මිනිස්සුන්ට බඩු දෙනකොට මේ වගේ වැඩ කරන්න එපා.”

දිගින් දිගටම සිදුවන ඇගේ ගෝරනාඩුව අවට පිරිස් වලටද කන්දොස් කිරියාවක් විය.

කෙසේ වෙතත් වෙළෙඳසල් හිමියා ඇයට කිසිවක් නොකියා වෙළඳසලේ රැඳී සිටි පිරිසට කීවේ පොල් ගෙඩියේ ඇතුළට රිංගලා බලන්න විදිහක් නෑනේ අනික පොල් ගෙඩිය තෝරාගත්තෙත් ඔය මනුස්සයාමයි” 

කියාය.දන්නවද පොල් ගෙඩියේ ගාන හැටයි. ගමේ ඉඳන් ටවුමට ත්‍රීවිල් එකට රුපියල් පන්සීයයි.