(වැල්ලම්පිටිය ශාන්ත සෙනෙවිරත්න)
අවුරුදු උත්සවයක පැවති තරග අතර බිත්තර ඇල්ලීමේ තරගයේදී තම්බපු බිත්තරයක් හුවමාරු වූ සිද්ධියක් ගැන නාගරික ප්‍රදේශයකින් අසන්නට ලැබිණි.

සිද්ධිය මෙසේය.

එය නගරබද ප්‍රදේශයක පැවති අවුරුදු උත්සවයකි. පැරණි ජන ක්‍රීඩා රැසක් එහි සංවිධානය කර තිබූ අතර, බිත්තර ඇල්ලීමේ තරගයක්ද ඒ අතර විය.

තරගය සඳහා ඉදිරිපත් වූ තරුණ ජෝඩුවලට සංවිධායකයන්ගෙන් තරගයට අවශ්‍ය බිත්තර ලැබී ඇත. තරගය කෙමෙන් උණුසුම් වෙද්දී සමහරු බිත්තර බිඳගෙන ඇඳුම්වල තවරාගැනීම නිසා වෙනත් ඇඳුම් ඇඳ ගැනීමටත් සිදුවී ඇත.

තරගයට එක්වූ පිරිස අතරින් දෙන්නා දෙන්නා පරාජය වී තරගයෙන් ඉවත් වෙද්දී දෙදෙනෙක් අතර හුවමාරු වූ බිත්තරයක් ගැන අවධානයෙන් සිටි සංවිධායකයකුට සැකයක් ඇතිවී තිබේ. හේතුව බිත්තරය බිම වැටුණත් එය බිඳී නොගිය නිසාය. පසුව දෙදෙනා අතර හුවමාරු වූ බිත්තරය තවදුරටත් පරීක්ෂා කරද්දී එය තම්බපු බිත්තයක් බව හෙළිවී ඇත. බිත්තරය මාරු වුණේ කෙසේ දැයි විමසද්දී බිත්තර ළඟ තිබූ හෝටලයකින් ගෙනා නිසා අතපසුවීමකින් තම්බපු බිත්තරයක් බිත්තර ගොඩට එක්වන්න ඇතැයි කොටසක් කියා ඇත. එහෙත් පරාජය වූ අය එය නොපිළිගත් නිසා තම්බපු බිත්තරය තරගයෙන් ඉවත් කර අලුත් බිත්තරයක් තරගකරුවන්ට ලබාදී තරග කොන්දේසි පනවා ඒ අනුව තරගය නැවත පවත්වන්නට තීරණය කර තිබේ.