(පේරාදෙණිය ටි්‍රක්සි හේරත්)
අසනීප වී ප්‍රතිකාර ගැනීමට ගොස් නැවත නිවසට එද්දී තම සිය බෑණා නිවසේ දොර ජනෙල් උළු වහු හා මුදල් සොරකම් කිරීමේ සිද්ධියක් මහනුවර තෙල්දෙණිය ප්‍රදේශයේ සිදුව ඇතැයි මහනුවර පොලිසිය පවසයි.

මෙසේ මුදල් හා දේපළ සොරා කෑමට ලක්ව ඇත්තේ ඉකුත් හයවෙනිදා බවත් පැමිණිලිකාරියගේ දියණියගේ දරුවන් හා බෑණා පැමිණිලිකාරියගේ නිවසේ කාමරයක ජීවත්වන බවත් පැවසෙන අතර සිද්ධිය වූදා උදෑසන 6.30 ට පමණ පැමිණිලිකාරිය ප්‍රතිකාර ගැනීම සඳහා නිවසින් පිටත්ව ගිය බව පොලිසිය කළ පැමිණිල්ලේ සඳහන් වේ.

නැවත සවස තුනට පමණ නිවසට ආපසු පැමිණි අවස්ථාවේදී ඇය පදිංචි නිවසට එන බෑණා පදිංචි නිවස වෙන් වීමට යොදා තිබූ දොරෙහි ඉබි යතුරු කඩා දමා නිවසට ඇතුළුවී දොර අසල බිත්තියට හේත්තු කර තිබූ කොස් දැවයෙන් නිම කරන ලද දොර උළුවහු දෙකක් හා පලු තුනකට සාදන ලද ජනෙල් දෙකක් හා නිවසේ තිබූ රුපියල් අට දහසක් පමණ වටිනා මුදල් නොමැති බව දැක ඇත. පසුව වැඩිදුරටත් කළ සොයා බැලීමේදී බෑණා විසින් ඔහුගේ නිල් පැහැ ලොරි රථයේ මෙම ජනෙල් උළුවහු ප්‍රවාහනය කළ බව අසල් වැසියන් විසින් දැක ඇති අතර බෑණා යළිත් එකී දේපළ ගෙනවිත් දෙයි යන විශ්වාසය මත පොලිසියේ පැමිණිලි නොකර ඇති අතර එම විශ්වාසය පළුදුවීම මත තම දේපළ හා මුදල් සොරාගෙන ඇති බවට ඉකුත් 22 දා තෙල්දෙණිය පොලිසියට පැමිණිලි කර ඇති අතර සැකකරු මෙතෙක් අත්අඩංගුවට ගෙන නැත.