තම දියණියට නමක් තැබීමට ඇයගේ උපන් නැකතට අනුව දුන් අක්ෂර කිසිදු ගැළපීමක් නැතැයි පැවැසූ පුද්ගලයකු හොඳ හැටි පදම්වී නමට අකුරු සාදාදුන් දෛවඥයාට බැණ වදිමින් ඔහුගේ නිවෙස ඉදිරිපස යකා නැටූ බව කියවෙන පුවතක් ගම්මානයකින් වාර්තාවේ.

සිද්ධිය මෙසේය.
ඔහු තම ජීවිතයේ බොහෝ දෑ නැකැත් ශාස්ත‍්‍ර අනුව ඉටුකරගන්නට කටයුතු කරන පුද්ගලයෙකි. පුංචි දියණියගේ උපන් නැකතට අනුව නමක් තැබීමට ඔහුට අවශ්‍ය විය. ඒ සඳහා උපන් වේලාවද කොළයක ලියාගෙන ඔහු කෙළින්ම ගියේ ගමේ දෛවඥයා වෙතය.

දැරියගේ උපන් නැකත අනුවත් පොත පතෙහි සඳහන් සාස්තරය අනුවත් දෛවඥයාද දැරියට නම් තැබීම සඳහා අකුරු පහක් කොළයක ලියා දුන්නේ අලූත උපන් දැරියට ආශිර්වාද කරමිනි. අකුරු ලියූ කොළ කැබැල්ලත් රැුගෙන ඔහු කෙළින්ම ගියේ ඒ වනවිටත් දරු ප‍්‍රසූතිය සිදුකර රෝහලේ සිටින තම බිරිය වෙතය.

අකුරු ලියූ කොළ කැබැල්ල ඔහු ඇය වෙත පෑවේ ”ඔන්න අකුරු පහක් තියෙනව හොඳ එකකින් දුවට නමක් තියන්න” යනුවෙන් පවසමිනි.
කොළ කැබැල්ල අතට ගත් බිරියගේ මුහුණ අඳුරු විය. ඊට හේතුව විමසද්දි ඇය කීවේ ”බලන්න මේ අකුරු එකකින්වත් හොඳ නමක් හදන්න බැහැනේ” යනුවෙනි.

අකුරු ටික සඳහන් කොළ කැබැල්ල අතට ගත් ඔහුද එය කියවා බැලූවේය. කාරණාව ඇත්තය. ඔහුට යකා නැංගේය. ඔන්න ඔහේ ඔයාට කැමැති නමක් තියන්න” යැයි බිරියට කී ඔහු රෝහලින් පිටත්ව ඊළඟට ගියේ නගරයේ තැබෑරුමටය.

එතනින් හොඳහැටි පදම්වූ ඔහු දෛවඥයාගේ නිවෙස ඉදිරිපසට ගොස් දේශනාව පටන් ගත්තේ ගමටම ඇසෙන්නටය. දේශනාව පරුෂ වචනවලින්ද අඩුවක් නොවීය. බොහෝ වේලාවක් එය ඉවසමින් සිටි දෛවඥයාගේ බාල දරුවා නිවෙසින් එළියට ආවේ කඩුල්ලේ පොල්ලක්ද රැගෙනය.
ඔහුගේ අතේ රැඳි පොල්ල දකිද්දීම චණ්ඩියාගේ හඬද ටිකින් ටික බාල විය. ටික වේලාවක් එහි රැඳී සිටි ඔහු පූස් පැටියකු මෙන් පාර දිගේ යන්නට වූයේ කිසිවක් නොවූ ගානටය.