(උණවටුන - ඩී.ජී. සුගතපාල)
නිවාස ව්‍යාපෘතියක පදිංචිව සිටි රාජ්‍ය ආයතනයක සේවය කරන කාන්තාවකි. මෙම නිවෙසට යතුරු තුනක් තිබෙන අතර ඇය ළඟ තබාගෙන සිටියේ එක් යතුරකි. අනෙක් යතුරු දෙකෙන් එකක් ඥාති සහෝදරයකුට ද එකක් ඥාති සහෝදරියකටද දී තිබින. එසේ දී තිබුණේ දිවා කල නිවෙස බලා ගත්තේද බොහෝවිට නිවෙසට අවශ්‍ය බඩු මුට්ටු ගෙනැවිත් දෙන්නේද ඔවුන් නිසාය.

මේ අතර සිරිත් පරිදි ඇය උදෑසන රාජකාරියට ගිය පසු ඥාති සහෝදරයා දහවල් මාළු ගෙනාවේය. ඔහු ඉදිරිපස දොරහැර මුළුතැන්ගෙට ගොස් මාළු ශීතකරණයේ තැබුවේය. නිවාස ව්‍යාපෘතියේ ආරක්ෂක නිලධාරීන් සිටියද සාමාන්‍යයෙන් දිවා කල වුවද නිවස සෝදිසි කිරීම ඔහුගේ සිරිතය. ඒ තම ඥාති සොහොයුරියට ඇති ළෙන්ගතුකම නිසාය.

ඔහු කාමරයේ දොර රෙද්ද මෑත්කර බැලුවේය. ඔහු දුටුවේ කිසිසේත් බලාපොරොත්තු නොවූ දසුනකි. ඔහු දුටුවේ කාන්තා යට ඇඳුම් කිහිපයක් තුරුලු_ කරගෙන ඇඳමත සිටි නිරුවත් පුද්ගලයෙකි. අමුතු ලෝකයක සිටි නිසා නිවසට කෙනෙක් පැමිණි බවක් නිරුවත් පුද්ගලයාටද දැනුණේ නැත. ඔහුගේ සිතට එක්වරම බයක් දැනුණද පසුව ඔහු කෑගසා අසල්වාසීන්ද ආරක්ෂක නියාමකවරුන්ද කැඳවා ගත්තේය.

පසුව නිවාස ව්‍යාපෘතියේ නිලධාරියකු ද පැමිණ නිරුවත් පුද්ගලයා හඳුනා ගත්තේය. එම පුද්ගලයා නිවාස ව්‍යාපෘතියේම සේවකයෙකු වන අතර නිලධාරියා පැවසුවේ එදින ඔහුට කිසිම වැඩක් පවරා නොමැති බවය. පිරිසගෙන් ලැබුණ සංග්‍රහ මධ්‍යයේ පොලිසිය පැමිණ සැකකරු අත්අඩංගුවට ගත්තේය.