(උණවටුන ඩී.ජී.සුගතපාල)
ඇයගේ කරදරවල අඩුවක් නැත. ගෙදර දොරේ අඬ දබරද එමටය. මේ සියල්ල දැන සිටි ඇයගේ හිතවතියක් ඇයට කදිම උපදෙසක් දුන්නාය. “අර කපු මහත්තයා හරියට බලන් හිටිය වගේ ඔක්කොම කියනවා. ඔය අපල ඔක්කොම නැති වෙන්න පූජාවකුත් කරල දේවි“මිතුරිය ඇයට කීවාය.

ඒ අනුව ඇය දිනක් නිවසේ අයට ද හොරෙන් කපුවාගේ දේවාලය සොයා ගියාය. කපටි කපුවාද ඇයගේ කටින්ම තොරතුරු දැනගෙන බලා හිටියා මෙන්ම සියල්ල නිවැරදිව කිව්වේය. ඇතිවි තිබෙන සියලු‍ම අපල දුරු කරවා පවුලේ සමගිය දියුණුව උදාකර දීමට ද කපුවා පොරොන්දු විය. ඒ සඳහා පූජාවට අවශ්‍ය කරන දේවල්වල ලැයිස්තුවක්ද ඇය අතට පත්විය.

ඇයගේ හිතට යම් සහනයක්ද ලැබිණි. ඇය අපල දුරුවි  සාමය සතුට ළඟාකර ගැනිමේ අරමුණින් පූජාවට සූදානම් වූවාය. පූජාවට අවශ්‍ය පළතුරු සඳහා ඇය මිලද නොසළකා හොඳම පළතුරු ගත්තාය. නොයිඳුල්ව කැවිලි වර්ගද සැදුවාය. පළතුරු වර්ග හතක් කැවිලි වර්ග හතක් ඇතුළු මල් බුලත් සුවඳ දුම් ආදියද රැගෙන ඇය ත්‍රිරෝද රථයක නැගී දේවාලය බලා පිටත්වූවාය.

දේවාලය ආසන්නයේ කඩයක් අසල ත්‍රිරෝද රථය නතර කළේ ඇයට අමතකවූ  තවත් දේවල් කිහිපයක් ගැනීම සඳහාය. ඇය පූජාව සඳහා ගෙනෙන ලද පළතුරු සහ කැවිලි පාර්සලය ත්‍රි රෝද රථයේ පිටුපස අසුනේ තබා කඩයට ගියාය. සෑහෙන වේලාවකට පසු ඇය යළිත් ත්‍රි රෝද රථය වෙත පැමිණියාය. පිටුපස අසුනේ තබා ගිය පළතුරු කැවිලි පාර්සලයේ යම් අඩුවක් දක්නට ලැබුණ නිසා ඇය එය දිගහැර බැලු‍වාය.

පළතුරුවලින් හොඳම පළතුරුද කැවිලිවලින් කොටසක්ද අඩුය. ඇයගේ බලාපොරොත්තු සියල්ල බිඳ වැටිණි. දෙනෙත් කඳුළින් බරවිය. “කෝ මේ පාර්සලේ තිබුණ පළතුරුයි කැවිලියි. “ඇය ත්‍රි රෝද රථ රියදුරාගෙන් ඇසුවාය.

“අනේ මිස් මට මාර බඩගින්නක් හැදුණා. මම ටිකක් කෑවා “ත්‍රිරෝද රථ රියදුරා කීවේය.

ඇයට සියල්ල අමතක විය. අත දිගහැර ත්‍රිරෝද රථ රියදුරුට පහර පිට පහර කිහිපයක් එල්ල කළාය. එසේ පහරදුන් ඇය ත්‍රි රෝද රථ රියදුරා එළවා දැම්මාය. මේ අතර පේනතෙක් මානයේ සිටි දෙවියන් මේ සියල්ල නොදුටුවා නොඇසුනාමෙන් අහක බලාගෙන සිටියේය.