(අතුල බණ්ඩාර)

දන්සල් කෑම වේලක රස බලන්නට සිතී පොසොන් දන්සලකට ගිය අයකුට දන්සලේ කෑම වේල පමණක් නොව තමන් පැමිණි යතුරුපැදියද අහිමිවීමේ සිද්ධියක් ගැන අනුරාධපුර පොලිසියෙන් අසන්නට ලැබුණි.

මේ සිද්ධියට මුහුණ පෑමට සිදුවී තිබුණේ අනුරාධපුර නගර සීමාවේම පදිංචිකරුවෙකුටය. මෙවර පොසොන් දන්සලකින් කෑම වේලක් කෑමේ ආශාව ඇතිවී මේ තැනැත්තා රුවන්වැලි මහා සෑය අසල පැවැත්වූ බත් දන්සලකට ඉකුත් 17 වැනිදා දහවල් ගොස් තිබුණේ තමන් පැමිණි යතුරුපැදිය ඒ අසල තැනක නවත්වා එහි හැඬලයද අගුලු දමමිනි. දන්සලෙන් කෑම කෑමට සිය ගණනක් පැමිණ සිටි නිසා එහි පෝලිමද මීටර් දෙතුන් සියයක් දුරට පැවැතිණි. මේ නිසා පැයකට ආසන්න කාලයක් පෝලිමේ සිටියත් ඔහුට දන්සලට ඇතුළුවෙන තැනටවත් කිට්ටු වෙන්නට නොහැකිවූ බැවින් දන්සල් වේලක රස බැලීමේ ආශාව අමතක කර යතුරුපැදිය නවත්වා තබා ගිය තැනට පැමිණ තිබුණේ ආපසු නිවස බලා යාමේ අදහසිනි.

නමුත් ඔහුට තරු පෙනුණේ හැඬලයද අගුලු දමා නවතා තබා ගිය තැන තම යතුරුපැදිය නොතිබුණු බැවිණි. ඒ අවස්ථාවේ එතැන රැඳී සිටි අයගෙන් යතුරුපැදිය ගැන විමසුවද ඒ අය යතුරුපැදිය ගැන අවධානයකින් නොසිටි නිසා එය රැගෙන ගියේ කවරෙකු දැයි ඔවුන් දැක නොතිබුණි. පසුව වහා රුවන්වැලිසෑය අසල රාජකාරියේ නිරතව සිටි පොලිස් නිලධාරීන් ළඟට දිවගිය ඔහු තමන්ට මුහුණ පෑමට සිදුවූ කරදරය ගැන ඔවුන්ට පැවසූ විට ලැබුණු උපදෙස් අනුව අනුරාධපුර පොලීසියට පැමිණ යතුරුපැදිය නැතිවීම ගැන පැමිණිලි කර ඉල්ලා තිබුණේ කෙසේ හෝ එය සොයා දෙන ලෙසයි. රුපියල් ලක්ෂ එක හමාරකට ආසන්න වටිනාකමකින් යුත් තම යතුරුපැදිය නැතිවීම ගැන කනගාටුවට පත්වූ ඔහු පොලිසියේදී පවසා ඇත්තේ දන්සල් කෑම වේලක රස බලන්නට ගොස් එම කෑමවේලත් අහිමිවී සිදුවූ මේ සිද්ධිය මියයනතුරු තමන්ට අමතක නොවන බවයි.