දතක් ගැලවීමට ගොස් හිරිවැටෙන එන්නත් ලබාදීමෙන් පසු උදේ ආහාරය ගන්නට ගොස් අකරතැබ්බයකට පත්වූ ව්‍යාපාරිකයකු පිළිබඳව වාර්තා වේ.

ව්‍යාපාරික ස්ථානය විවෘත කිරීමට පෙර ඔහු ගියේ නරක් වූ දත ගලවා ගැනීමටය. වෛද්‍යවරයා එන්නතක් දී විනාඩි විස්සකින් එන්නැයි ඔහුට දැන්වීය.

දත ගැලවූ පසු ආහාර ගැනීම අපහසුවන නිසා ඔහු ඉක්මනින්ම අසල හෝටලයට ගියේය. ආප්ප ඇණවුම් කළේය. එකින් එක ආප්පය බැගින් ගිල දමන්නට සූදානම් වුවත් ටිකෙන් ටික කට හිරිවැටෙන නිසා හැපීම අපහසු විය. ආප්ප කැබලි මුවෙන් බිම වැටෙනවා හෝ ඔහුට තේරුණේ නැත.

හෝටල් සේවකයා ”ඇයි මහත්තයා අසනීපයක්දැයි” විමසූවිට ”මට වතුර එකක් ගේන්නැයි” ඔහු කීය.

කට සෝදාගැනීමට ගත් උත්සාහයද සාර්ථක නොවීමෙන් පසු මුදල් ගෙවා යළි වෛද්‍යවරයා හමුවට ගියේ නිසි වේලාව එළැඹි නිසාය.

දත ගැලවීමට සූදානම්වූ වෛද්‍යවරයා ව්‍යාපාරිකයාගේ මුව විවර කළේය. ආප්ප කැබැලි කට පුරා විසිර තිබිණි. ඒ දුටු වෛද්‍යවරයා සිනහසෙන්නට පටන් ගත්තේ ”තමුසෙ උදේ පාන්දරම පුන්නක්කු කෑවාදැ”යි විමසමිනි.