බිරියක් විසින් තම සැමියාට දුන් අපූරු නත්තල් තෑග්ගක් පිළිබඳ ගාල්ල පොලිසියෙන් වාර්තාවේ.

ඔහු විසිඅට හැවිරිදි පෞද්ගලික බස් කොන්දොස්තරවරයෙකි. දරු දෙදෙනකුගේ පියෙකි. ඔහු තම බසයෙන් ගාල්ලේ උපකාරක පංතියකට එන දාහත් හැවිරිදි සිසුවියක් සමග හිතවත්කමක් ඇතිකර ගත්තේය. ඉන්පසු ඔහු ඇයට කිසි දිනක ටිකට් ගන්නැයි කීවේ නැත. ටිකට් නොගෙන බසයේ යන්නට ලැබීම භාග්‍යයක් සේ ඇය ද සැලකුවාය.

වැඩිකල් නොගොස් මේ හිතවත්කම ආදරයට පෙරළුණේය. එහි උපරිම ප්‍රතිඵලය වූයේ ඔහු ඇය සමග පැන ගොස් රහසේ කුලී නිවසක පදිංචිවීමය. එහෙත් ඔහු විවාහකයකු බව ඇය දැන සිටියේ නැත. අනෙක් ප්‍රතිඵලය වූයේ ඇයගේ අධ්‍යාපනය එතැනින් අවසන්වීමය. දියණියගේ අතුරුදන් වීම සම්බන්ධයෙන් ඇයගේ මව්පියන් පැමිණිලි කර තිබූ අතර මෙය දැනගත් බිරිය ද පොලිසියට පැමිණිල්ලක් කළාය.

එහෙත් ඇය උපායශීලී වූවාය. කලබල වූයේ නැත. කටයුතු කළ යුතු ආකාරය පිළිබඳව පොලිසියෙන් ද උපදෙස් ලැබිණ. ඇය සැමියාට දුරකතනයෙන් කතාකොට නත්තල් දිනයේවත් තමා සහ දරුවා බැලීමට එන ලෙසත් එක දිනක් හෝ තමා සමග ද සිටින ලෙසත් ආරාධනා කළාය. ඔහුට දීමට පුංචි නත්තල් තෑග්ගක් සූදානම්කරගෙන තිබෙන බව ද ඇය පැවසුවාය.

මේ ඉල්ලීම ඉවත දැමීමට ඔහුට නොහැකිවිය. නත්තල් දිනයේ බිරිය සහ දරුවන් බැලීමට ඔහු පැමිණියේ යහලුවෙකුගේ නිවසට ගොස් එන්නම් යනුවෙන් අනියම් බිරියට පවසමිණි. බිරිය සුහදව ඔහු පිළිගත්තාය. මාස කිහිපයකින්නේ අපි එකට ඉන්නේ යමු කාමරේට ඇය කීවාය. ඔහුද එයට සූදානම්ව කාමරයට යාමට සූදානම්විය. එහෙත් අවාසනාවට ඔහුට යාමට වූයේ කාමරයට නොව පොලිස් ජීප් රථයටය.

රැකවලෙහි සිටි පොලිස් නිලධාරී කණ්ඩායමක් විසින් දාහත් හැවිරිදි තරුණියක් පැහැරගෙන යාමේ චෝදනාව යටතේ ඔහු අත්අඩංගුවට ගත්තේය. පොලිස් ජීප් රථයට නංවා ගත් ඔහු ළඟට පැමිණි බිරිය “කොහොමද මගේ නත්තල් තෑග්ග” යනුවෙන් ඇසුවේ කෝපයෙන් ගිනියම් වූ දෑසින් යුතුවය.

ගාල්ල පොලිසියේ ළමා හා කාන්තා කාර්යංශයේ ස්ථානාධිපතිනි උප පොලිස් පරීක්‍ෂිකා මංගලිකා සූරිආරච්චි, උප පොලිස් පරීක්‍ෂක ජයරත්න, සැරයන් සමරනායක (25312) කොස්තාපල්වරුන්වන මධුසංක (60658), ක්‍රිශාන්ත (49862) යන මහත්ම මහත්මීන් විසින් සැකකරු අත්අඩංගුවට ගෙන ඇත.

(උණවටුන - ඩී.ජී. සුගතපාල)