මොවුන් ගජ මිතුරන්ය. ගමන් බිමන් ගියේ එකටය.

කෑවේ බීවේ ද එකටය. අන්තිමට දෙන්නාම හෙරොයින් ඉරීමට පුරුදු වූයේ ද එකටමය. කාලය ගෙවී යද්දී මොවුන් දෙදෙනා සමඟ මත්ද්‍රව්‍යවලට ඇබ්බැහිවූවන් පිරිසක් ද එකට එකතු වූයේ කුණු ගොඩට කුණු එකතුවන්නා සේය. මේ කියන මිතුරන් දෙදෙනා පදිංචිව සිටියේ තලාතුඔය පොලිස් බලප්‍රදේශයේය. දවසක් හෙරොයින් මිලිග්‍රෑම් තිහක් ඉනේ ගසාගෙන එමින් සිටියදී එක් මිතුරකු තලාතුඔය පොලිසියට කොටුවූයේ අහම්බෙනි.

මාර්ග සෝදිසියක යෙදී සිටි පොලිසියේ රාලහාමිලාට සැක සිතී කළ පරීක්ෂාවේදී ඉනේ ගසාගෙන සිටි හෙරොයින් බිම වැටෙද්දී ඔහුගේ අතට මාංචු වැටිණි. “මචං අරූ බඩුත් එක්ක මාට්ටු වෙලා.” තවත් අයෙකු මේ ආරංචිය මිතුරාගේ කනේ තිබ්බේ කදිම උපදෙසක් ද දෙමිනි. “උඹ ඌ බලන්න යනවා නම් බඩු ටිකකුත් අරන් පලයන්” ඒ දුන් උපදෙස් පිළිබඳ දෙවරක් කල්පනා නොකළ මිතුරා හෙරොයින් ග්‍රෑම් 30ක් මිලදී ගෙන යට ඇඳුමේ සඟවාගෙන පොලිස් සිර කූඩුවේ සිටින මිතුරා හමුවීමට ගියේ එය තෑගි කිරීමටය.

තෑග්ග මිතුරාට දෙන්නට සූදානම් වූවා පමණි. මාංචුව ඔහුගේ අතට වැටුණි. ඔහුට තරු පෙනෙන්නට ගත්තේ ඊට පසුවය.

(තලාතුඔය ටී.එම්. සරත්)