ඔහු පෙදරේරුවෙකි. මේ දිනවල පවතින අධික වර්ෂාව හේතුවෙන් රැකියාවට නොයයි. 

ජල ගැලීම් හා වෙනත් ආපදා පිළිබඳව දැන ගැනීම සඳහා මොහු වේලාවට රූපවාහිනිය ළඟට යාම සිරිතය. එදින ප්‍රවෘත්ති පටන් ගැනීමට විනාඩි පහක් පමණ තිබියදී බිරිඳට කියා කහට කෝප්පයක් සූදානම් කරගෙන රූපවාහිනිය ඉදිරියෙන් වාඩිවිය. 

අල්ලට සීනි කා කහට බීමට ඔහු ඉතා කැමැතිය. කහට කෝප්පය පිළිගැන්වු බිරිඳ පඩික්කම ද ඔහු ළඟ ගෙනත් තැබුවේ කහට බිවූ ගමන් ඔහු බුලත්විටක් හපන බව දන්නා නිසාය. 

සීනි බෝතලයේ පියන හැර පසෙක තබා අල්ලට ගත් සීනි සමග කහට කෝප්පය බී හමාර කළ මොහු සීනි බෝතලයද පය පාමුල තබා ගත්තේය. 

ප්‍රවෘත්ති කීම ආරම්භ විය. විශාල නාය යෑම්, ගෙවල් යටවීම්, අනාථ වු ජනතාව එම කඳවුරුවල සිටින අයුරු ඇසු ඔහුට විශාල ශෝකයක් ඇති විය. මේවා නරඹන අතර ඒ දෙස බලමින් සීනි බඳුන රැගෙන ඒ තුළට බුලත් කෙළ ගැසුවේ දැඩි වේදනාව හා අනුකම්පාව නිසාය.
මේ ආකාරයට ප්‍රවෘත්ති අවසාන වන තෙක් බාසුන්නැහේ රූප පෙට්ටිය නරඹන ලදී.

නමුත් පඩික්කමයැයි කියා කෙළ ගසා ඇත්තේ සීනි බෝතලයට බව දැන සිටියේ නැත. 

මඳ වේලාවකින් බිරිඳ පැමිණ සීනි බෝතලයද රැගෙන කුස්සි කාමරයට යන ලදී. බෝතලය තුළ යමක් තිබෙනවා දැක පරීක්ෂා කිරීමේදී ඒ තුළ බුලත් කෙළ පිරී තිබුණි.

ඈ දෙයියනේ මේ සීනි බෝතලේ බුලත් කෙළ පිරිලා. ඇයි මේකට කෙළ ගැසුවේ කියා අසා සිටින ලදී. ආ මට ලොකු වැරදීමක්. මම කඬේට ගිහිල්ලා ඔයාට සීනි ගෙනත් දෙන්නම්. සීනි ටිකක් වගේද ඕයි මේ අනාථ වෙලා සිටින මිනිස්සු. උන්හිටි තැනුත් නැති වෙලා. මට වත්කම තිබුණා නම් මම මේ අසරණ වෙලා ඉන්න අයට සීනි මිටිය බැගින් ගිහින් දෙනවා. තේරුණාද? කියන ලදී. බිරිඳ ළිඳ ළඟට ගොස් සීනි බෝතලේ ශුද්ධ කර සෝදනවා දුටිමි. 
(දයාසේන කේ. ගමගේ)