(මැදිරිගිරිය චාපා මධුභාෂිණි)

තම හිතවතකුගේ මවගේ මරණයට ගොස් ආචාර කිරීමට අමතක වී දවල්ටත් සප්පායම් වී යෑමේ අපූරු සිද්ධියක් මැදිරිගිරිය ප්‍රදේශයෙන් වාර්තා වෙයි.

වර්තාවන අන්දමට සිද්ධිය මෙසේය. ගමේ පාසලක ගුරුවරයකු ලෙස සේවය කරන නගරයෙන් ගමට ගිය තරුණයෙකි. කා සමගත් හොඳ ජනප්‍රිය පුද්ගලයෙකි. පසුගිය දිනක තමා හඳුනන පුද්ගලයකුගේ මවක මියගොස් ඇත.

පාසල් ගොස් නැවත නවාතැනට ආ මෙම තරුණයා ඇඟපත සෝදාගෙන මළ ගෙදරට පිටත් විය. මළගෙදරට ගොඩවෙනවාත් සමග එහි සිටි පිරිසක් ‘ආ සර් කොහොමද?’ කියා අසමින් කතාබහට මුලපිරීය. කතා බහටම කාලය ගත කෙරිණි. ආ කාරණය අමතක විය.

ඒ අතර තම හිතවතා ද ඔහු හමුවට ආවේය. ‘සර් දැන් ද ආවේ’ යැයි විමසීය. ‘යමු... යමු... කෑම ටිකක් කන්න’ යැයි පවසා අසල්වැසි නිවෙසකට කැඳවාගෙන ගොස් දහවල් ආහාරයෙන් ද සංග්‍රහ කළේය. කෑම කා අවසානයේ නැවත මළගෙදරට යාමට අදහස් කළත් අවමගුල් උත්සවයේ කටයුතු ආරම්භ කර තිබූ නිසා ගුරුවරයා නැවත එහි නොගොස් ආපසු නවාතැනට පැමිණියේය. පොඩි නින්දකට වැටුණු ඔහු නැවත අවදිවී හිසේ අත ගසා ගත්තේ. මළගෙදර ගියත් මියගිය මෑණියන්ට ආචාර කරන්න බැරිවුණානෙයි තම හිතවතකු සමග කියන විට කාටත් සිනාව නවතා ගැනීමට අපහසු විය.