පෝයදා නිවාඩුව ගත කිරීමට ගෙදරට වී සිටින විට බිරිඳ පවරන දහසක් වැඩවලින් හා ඇයගේ කන්කරච්චලෙන් බේරෙන්න පන්සලට ගොස් සිල් සමාදන් වන පුද්ගලයකු පිළිබඳ පුවතක් තලාතුඔය ප්‍රදේශයෙන් වාර්තා වේ.

පෞද්ගලික ආයතනයක මුරකරුවකු වන ඔහු දිවා රාත්‍රි වැඩ මුර දෙකම කරන්නේ තමන්ට කීයක් හෝ වැඩියෙන් හම්බකර ගැනීමට හා බිරිඳටත් දරුවන්ටත් සැපවත් ජීවිතයක් ගත කිරීමේ අරමුණින්ය. දෙදරු පියකු වන ඔහු මත්පැන් දුම්පානයෙන් තොර අහිංසක ගැමියෙකි. ඔහුගේ තවත් බලාපොරොත්තුවක් වන්නේ තම දරුවන් දෙදෙනාට හොඳට උගන්වා හොඳ රැකියා සඳහා යොමු කිරීමටය. මාසයක් වෙහෙස වී වැඩ කරන ඔහුට හරියට නිවාඩුවක් ලැබෙන්නේ පසළොස්වක පෝයදා පමණි. එදින නිවාඩුවෙන් ගත කිරීමට බලාපොරොත්තු වුවද තරමක් සැරවැර ඇති බිරිඳ දවස පුරා ඔහුට පවරන දහසකුත් රාජකාරි කිරීමට හා ඩිංග වැරදුනාම ඇයගෙන් බැනුම් අසන්නටද ඔහුට සිදුවිය. මේ වදෙන් ගැලවීමට උපායක් කල්පනා කරමින් සිටින විට ඔහුට අපූරු අදහසක් පහල වී ඇත. ඒ අනුව සෑම පෝයකටම ගමේ පන්සලට ගොස් සිල් සමාදන් වීමට පටන් ගත්තේය. දිනක් පන්සලට පැමිණි ඔහුගේ පැරණි මිතුරකු තම මිතුරා සිල් සමාදන් වී සිටිනු දැක ඔහු ළඟට ගොස් උපාසක මහත්තය හොඳ තීරණයක් අරන් තියෙනවා. අපි හැමදාම රස්සාව කරල හරියන් නෑ පින් අතේ වැඩත් කරන්න එපායැයි පවසා ඇත. එවිට උපාසක මිතුරා තම මිතුරාට මෙසේ කියා ඇත. මම පෝයට විතරයි නිවාඩුවේ ගෙදර ඉන්නේ. එදාටත් දවසම ගෑනිගේ කංකරච්චලේ. අර වැඬේ කරපන් මේ වැඩ කරපන් කියලා. ඒකෙන් බේරෙන්නත් එක්කයි මා සිල් ගත්තේ. පන්සලේ කිසිම කරදරයක් නෑ වෙලාවට දානේ ටික ගිලන්පස ටික ලැබෙනවා කිසිම කරදරයක් නෑ. ගෙදර හිටියොත් වෙන්නේ පව් පිරෙන එකනෙ. (ගලහ ඩබ්ලිව්.ඒ. අසේල)