(මොරටුව - රේඛා තරංගනී ෆොන්සේකා)
කොළඹට නුදුරු ජනප්‍රිය පාසලකි. දිනක් එම පාසලේ සිසුන් දෙදෙනකු විදුහල්පති හමුවට කැඳවන්නට වූයේ ඔවුන් දෙදෙනා නිතරම අසැබි වචනවලින් ආමන්ත්‍රණය කර ගනිමින් කටයුතු කරන බවට ආචාර්යවරයකු ලෙස කටයුතු කළ හිමි නමකගෙන් ලැබුණ පැමිණිල්ලකට අනුවය.

එකී සිසුන් දෙදෙනා සිය නම් වෙනුවට කාන්තා ලිංගික අවයව නාමයෙන් ආමන්ත්‍රණය කර ගන්නා අතර ඔවුන් වටා සිටින සියල්ලන්ටම මෙය ගැටලුවක් වුවත් සිසුන් දෙදෙනාට එහි ගැටලුවක් නොවීය.

විදුහල්පති හමුවට පැමිණ වූ සිසුන් දෙදෙනාට දඬුවම් ලෙස වේවැල් පහර දී එයින් ද නොනැවතුණ විදුහල්පතිවරයා නැවත එලෙස ආමන්ත්‍රණය නොකර ගන්නා ලෙසට පොරොන්දු වෙමින් ලිපි දෙකක් ලියන ලෙස ද සිසුන්ට අණ කළේය.

එක සිසුවෙකු ඉතා කඩිනමින් ලිපිය ලියා නිමකළ අතර අනෙක් සිසුවා ලිපිය ලිවීම මන්දගාමීව සිදු කරන්නට විය.

ලිපි දෙකම ලියා අවසන් වනතුරු දෙදෙනාටම පන්තියට යාමට අවසර නොවීය. මිතුරාගේ ලිපිය ලිවීම ප්‍රමාද වනු දුටු සිසුවාට උන්හිටි තැන් අමතක වන්නට ගත වූයේ නිමේෂයකි.

තමා සිටින්නේ විදුහල්පති ඉදිරියේ බව අමතක වූ ලිපිය කඩිනමින් ලියූ සිසුවා මන්දගාමී සිසුවා අමතා ඉක්මනට ලියපන්කෝ යැයි පරුෂ වචනයෙන්ම නියෝග කළේය. ඉන්පසු කුමක් සිදුවූයේ දැයි සිතාගත නොහැක.