වසරක් තුළදී සිය පෙම්වතා ලවා උපන්දින තෑගි දෙකක් ගන්නට උත්සාහ කළ යුවතියකට උපන්දිනතෑග්ගත් පෙම්වතාත් අහිමිවීමේ පුවතක් වියලුවේ ගම්මානයකින් වාර්තාවේ. 


සිද්ධිය මෙසේය. 


ඇය කාගේත් නෙත් සිත් ඇද බැඳ ගන්නා යුවතියකි. ඒ නිසාම ගමේ තරුණයන්ද ඇගේ ආදරය සොයා පැමිණියේ මල් සොයා එන බඹරුන් පරිද්දෙනි.


මේ තරුණයින් අතර සිටි එක් තරුණයකු ඇගේ ආදරය දිනා ගත්තේ ඔහු සතුව තිබූ කඩවසම් බවටත් රජයේ රස්සාවටත් පින්සිදු වන්නටය. 


සැබැවින්ම ඇයට ආදරය කළ හෙතෙම හැකි උපරිමයෙන් ඇගේ බොහෝ අවශ්‍යතාවන් සපුරන්නට කටයුතු කළේ ඇය කෙදිනක හෝ තම නිවසට කැන්දාගෙන ඒමට තිබූ බලාපොරොත්තුව නිසාය. 


‘අයියේ ලබන අට වෙනිදා මගේ උපන්දිනේ. ඔයා මට මොනවද දෙන්නේ’ දෙදෙනා මුණගැසුණු විටෙක තොදොල්වෙමින් ඇය විමසා සිටියේ තරුණයාට වඩාත් ළංවෙමිනි. 


සිය පෙම්වතියගේ ඉල්ලීමෙන් තිගැස්සුණු ඔහුට සිහිපත් වූයේ තමුන් මීට මාස හත අටකට පෙරද ඇයගේ උපන් දිනය වෙනුවෙන් වටිනා තෑග්ගක් ලබාදීමේ සිද්ධිය ගැනය.


එය සිහිපත් වුවද කිසිවක් නොකියූ තරුණයා ඇගෙන් සමුගත්තේ අටවන දිනට යෙදෙන උපන්දිනයට ඇය හමුවී වටිනා තෑග්ගක් ලබා දීමේ පෙරොන්දුවද ඇයට ලබා දෙමිනි. 


කෙසේ වෙතත් සියලු වැඩ අත්හැර දමා ආපසු නිවසට ගිය හෙතෙම තම දිනපොත පෙරළා බැලුවේ තමන්ගේ සිහියේ යම් අඩුවක් වී ඇද්දැයි සැක හැර දැන ගැනීමේ අටියෙනි. 


මීට මාස අටකට පෙර තම පෙම්වතියගේ උපන්දිනය වෙනුවෙන් වටිනා කරාබු කුට්ටමක් මිලදී ගෙන තිබූ බව එහි සටහන්ව තිබෙනු දුටු ඔහුට ඇය ගැන ඇතිවුයේ දැඩි කේන්තියකි, පිළිකුලකි. 


ඒ මොහොතේ කඩදාසියක් අතට ගත් හෙතෙම පිටු ගණනක දිගු ලිපියක් ලියා ‘උපන් දින දෙකක් ඇති ගෑනියෙක් මට වැඩක් නැහැ’ යනුවෙන් එය අවසන් කළේ වසරකට ආසන්න කාලයක් පැවැති ප්‍රේමයට තිත තබමිනි.

(වියලුව වාර්තාකරු)