ඉදුණු කෙසෙල්වලට වඩා අඩු මුදලකට අමු කෙසෙල් ගෙඩි ඉල්ලීම නිසා පලතුරු වෙළෙන්දෙකුට හොඳටම කේන්ති ගිය සිද්ධියක් ඉකුත් දිනක අගනුවරට ආසන්න ප්‍රදේශයක පලතුරු වෙළෙඳසැලකදී දැකගත හැකිවිය.

 ඔහු සෞඛ්‍යයට සම්බන්ධ ආයතනයක සේවය කරන්නෙකි. බොහෝ පලතුරු වෙළෙඳුන් පලතුරු ඉදවීම සඳහා රසායනික බෙහෙතක් යොදා ගන්නා බව දන්නා ඔහු වස විසවලින් තොර පලතුරු ලබා ගැනීමේ උපක්‍රමයක් වශයෙන් අමු කෙසෙල්, අමු අඹ, අමු පැපොල් ආදිය ගෙන ගොස් නිවසේදී ඉදවා ගනියි. 

එදින සේවය නිමවා නිවෙසට පැමිණෙමින් සිටි ඔහු පලතුරු කඩයකට ගොඩ විය. 

“කීයද මුදලාලි මේ ඇඹුල් කෙසෙල්?”

“කිලෝව අසූවයි මහත්තයා” මුදලාලි පිළිතුරු දුන්නේය.

ඒ ඉදුණු ඒවනේ. මට අමුවයින් කිලෝවක් දෙන්න” ඔහු ඉල්ලා සිටියේය.

 කෙසෙල් කිලෝව ලබාගත් මහත්තයා රු. 70 වෙළෙන්දා වෙත දිගු කළේය. 

“දහයක් අඩුයිනේ” මුදලාලි කීවේය.

“මේව ඉදවන්න බෙහෙත්වලට යන වියදම අඩු කරලයි මම ඔය දුන්නේ” යැයි උපහාසාත්මකව මහත්තයා දුන් උත්තරෙන් මුදලාලිගේ මුහුණ ඇඹුල් වී ගියේය. 

“අපි ගහන බෙහෙතක් නෑ මහත්තයෝ” යැයි නොරිස්සුම් සහගතව කී මුදලාලි ඉතුරු රුපියල් දහයද මහත්තයා වෙතින්  ඉල්ලා ගත්තේය.

(පොල්ගස්ඕවිට එස්. වික්‍රමආරච්චි)