අලුත විවාහ වූ කාන්තාවකට තම විවාහ සහතිකය වෙනුවට මරණ සහතිකයක් ලබා දීමේ පුවතක් පසුගියදා වාර්තා විය.

විදේශ රටක සේවය කරමින් සිටි තරුණියක් මෙරටට පැමිණ විවාහ වීමෙන් අනතුරුව නැවත සේවය කරන රටට යාමට අවශ්‍ය නිසා තම විවාහ සහතිකය එරටට ගෙන යාමට තිබූ අවශ්‍යතාව හේතුවෙන් තමන්ගේ විවාහ සහතිකය ලබාදෙන ලෙස අදාළ රාජ්‍ය ආයතනයට ගොස් ඉල්ලීමක් කර තිබේ.

ඉතා යුහුසුළුව එම සහතිකය ලබාදීමට රජයේ ආයතනයේ නිලධාරීන් කටයුතු කිරීම නිසා සතුටට පත් කාන්තාව නිවෙසට පැමිණ ඇති අතර සතියකින් පසු විදේශගත වීමට අවශ්‍ය ලියකියවිලි හා ගුවන් ටිකට්පත් පරීක්‍ෂා කිරිමේ දී අහම්බෙන් ඇස ගැටුණු තම විවාහ සහතිකය පරීක්‍ෂා කිරීමේ දී එය විවාහ සහතිකයක් නොව තමන් වෙනුවෙන් නිකුත් කළ මරණ සහතිකයක් බව දැක දැඩි කලබලයට පත්ව තිබේ. තමන් ජීවත්ව සිටියදීම තමන්ගේ මරණ සහතිකය තමන්ගේ අතට පත්වීම පිළිබඳව අදාළ රජයේ ආයතනයට දැන්වීමෙන් පසු එය වහා නිවැරදි කරදීමට ඔවුන් කටයුතු කළත් ජීවත්ව සිටිය දී මරණ සහිතකයක් ලැබූ එකම තැනැත්තා ද වීම පිළිබඳව එම කාන්තාව සතුටකින් පසුවන බවයි වාර්තා වුණේ.

(නයිනමඩම චන්දන ප්‍රනාන්දු)