පරණ පෙම්වතියගේ නමින් අතේ කොටා තිබූ පච්චයක් අලූත් පෙම්වතියගේ නමට හැරවීම සඳහා අත් බෙහෙතක් කළ තරුණයෙකුගේ පච්චය පැසැවීම නිසා රෝහල් ගතවී ප‍්‍රතිකාර ලබා ගන්නට සිදුවූ බව කියවෙන පුවතක් වියලූවේ ගමකින් වාර්තා වේ. සිද්ධිය මෙසේය. ඔහු වියලූවේ ගම්බද ප‍්‍රදේශයක තරුණ පෙදරේරුවෙකි. තම ගමේම තරුණියක හා පෙමින් බැඳුණු ඔහු ඇයට පණ මෙන් ආදරය කළේය. කොතෙක් ආදරය කළේද යත් ඇගේ නම සඳහන් කර අතේ පච්චයක්ද කොටා ගත්තේය. එය නිතරම පෙම්වතියට පෙන්වූ ඔහු ඇයට ඇති ආදරයේ් තරම කියාපෑවේ ඇය ඉදිරියේ සිහින ලෝකයක් මවා පාමිනි. කල් ගතවේද්දී තරුණ පෙම්වතා වෙනත් හදකට තුරුළු වූයේ පැරණි පෙම්වතියද සහමුලින්ම අමතක කර දමමිනි. පෙම්වතාගේ අතේ පච්චය පිළිබඳ ඉවෙන් මෙන් තතු දැනගත් අලූත් පෙම්වතිය, එය මකා දමන්නැයි පෙම්වතාට නිතර නිතර ඇවිටිලි කළේය. ”මට ආදරේ නම් ඔය පච්චය මකල එතන මගේ නම ගහන්න” ඇය තොඳොල් වෙමින් කියා සිටියාය. පෙම්වතියගේ ඇවිටිල්ල ඔහුටද හිසරදයක් විය. හෙතෙම පච්චය මකා ගන්නා ආකාරය ගැන මිතුරන්ගෙන්ද විමසුවේය. ”ඔතන හුණුයි සබනුයි අඹරල ගාපං” එක මිතුරෙන් අත් බේතක් කීවේය. පච්චය මත හුණු සහ සබන් අඹරා තට්ටුවක්ම තැවරීය. දින දෙකක් තුනක් ගත වෙද්දී පච්චය ඇති තැන රතුවිය. තුවාලයෙන් නරක් වු ලේ ගලන්නට විය. දැඩි සේ වේදනා දුන්නේය. බෙහෙවින් බියටපත් තරුණයා ළඟම රෝහලට ගියේ අතට ප‍්‍රතිකාර ගන්නටය. තුවාලයේ බරපතලකම දුටු වෛද්‍යවරු ඔහුට පිටගැස්මට බෙහෙත් විද තුවාලයට වෙදකම් කරන්නට වාට්ටුවකටද ඇතුළු කළහ. දැන් ඔහු පෙම්වතිය වෙනුවෙන් රෝහලේය.