(ආරච්චිකට්ටුව ලලිත් නවරත්න)
එළ ගව පට්ටියක් හිමි මැදිවියේ පුද්ගලයෙකි. එළදෙනුන්ගෙන් කිරි දොවා එම කිරි අලෙවිකර තම පවුල ජීවත් කරවන මොහු ගමේ පොදුවැඩ වලට උදව්කරන ගමන් තමන්ගේ වාසියට ද හොඳින් හෝ නරකින් වැඩ කරන්න ගොස් අමාරුවේ වැටුණ අවස්ථා පොලීසියේ ලැග්ග අවස්ථා නැතුවාම නොවේ.

දිනක් තමන්ගේ ගව පට්ටියත් සමග මිතුරු වූ වෙනත් ගව පට්ටියක හොඳින් වැඩුණු එළ ගවයන් දෙදෙනෙකු පැමිණියේ තම ගව පට්ටියේ එළගවයන් දෙදෙනෙකු පරිද්දෙනි. අයිතිකරුවෙකු නැති  මෙම එළගවයන් මසට  වික්කොත් තමන්ට එයින් ලොකු මුදලක් ලැබෙන බව සිතුවේ  දින කීපයක  පටන්ය.  ඒ අදහස මුදුන්පත්කර ගැනීමේ දිනය එළඹිණි.  එළගවයන් ප්‍රවාහනය සඳහා ලොරි රථය පැමිණියේය. 

එළගවයන් පටවන්න පටන් ගත්තේය.  වැඬේ සිතූතරම් පහසු නැත. හොඳින් වැඩී ඇති එළගවයින් පැටවීමට තවත් කීපදෙනෙකුගෙන් හෝ උපකාර අවශ්‍යව ඇත.  පාරේ ගමන් කළ හිතවතෙකි. 

ඔහුගෙන් එළගවයින් පැටවීමට උපකාර ඉල්ලා සිටියේ තමන්ගේ පට්ටියේ මේ ඉන්න එළගවයින් වැඩිනිසා වෙනත් පට්ටියකට දැමීමට රැගෙන යන බව පවසමිනි.  උපකාරයට පැමිණි තැනැත්තා දින කීපයකට ඉහත දී තම එළගව පට්ටියෙන් අතුරුදන්වූ එළගවයින් හඳුනාගත්තේ දත්මිටිකමිනි.  තරහා ඉහවහා ගියේය. ඔහු අතපය විසිකර නැවතුණේ පොලීසියේය.

ආරච්චිකට්ටුව පොලිස්ථානාධිපති අනුරාධ හේරත් මහතා ගවපට්ටි අයිතිකරු සිදුකිරීමට ගිය වංචාසහගත ක්‍රියාව පිළිබඳව අධිකරණය දැනුවත් කර නඩුවක්  දැමීමටද අමතක නොකළේය.