අනුන්ගේ දරුවකුට උප්පැන්නය දී ඉල්ලාගෙන කාලා

(රාජාංගණය නුවන් කුමාර)

වෙනත් අයකුගේ දරුවකුට උප්පැන්නය දී ඇය විවාහ කරගත් අයකුට වඳින්න ගිය දේවාලය හිසේ කඩා වැටීමේ සිද්ධියක් තඹුත්තේගම පොලිසියෙන් වාර්තා වේ.

ආරක්ෂක අංශයේ සිවිල් රැුකියාවක යෙදී සිටින තරුණයකුට දැනට වසර ගණනාවකට පෙර ගැබිනියක් බස් රථයකදී හමුවී ඇති අතර දෙදෙනා කතා කරමින් පැමිණෙමින් සිටියදී දෙදෙනාගේ පෞද්ගලික තොරතුරු පවා හුවමාරු කරගෙන තිබේ.

තම පෙම්වතා තමා ගැබිනියක් වූ පසු හැර ගිය බවත්, තමන්ට ජීවිතය පවා එපාවී ඇති බවත් තරුණයාට ඇය පවසා ඇත. ඉන්පසු තරුණිය ගැන අනුකම්පාවක් ඇතිවී ඔහු මෙම ගැබිනි කාන්තාව විවාහ කරගෙන ඇත.

දරුවා ලද පසු එම දරුවාටද උප්පැන්නයද ලබාදී වසර හතක් පමණ සතුටින් කාලය ගතකර ඇති අතර මෙම පුද්ගලයාට දාව දරුවන් දෙදෙනකුද එම කාලයේදී මෙම කාන්තාව බිහිකර ඇති අතර දරුවන් තිදෙනාටම හා තමන්ට එකසේ යුතුකම් ඉටුකළ තම ස්වාමියාට පිටුපාමින් මෙම කාන්තාව වෙනත් පුරුෂයින් සමඟ අනියම් ඇසුරු කිහිපයක් පවත්වාගෙන ගොස් ඇති බව දැනගත් ස්වාමියා ඒවා නතර කරන ලෙස කිහිප විටක්ම අවවාද කළද පළක් නොවූ නිසා පොලිසියේ ළමා හා කාන්තා කාර්යාංශයට පැමිණිල්ලක් ඉදිරිපත් කර තිබේ. 

වැරැුදි හදාගෙන තමන් සමඟම ජීවත්වන ලෙස කාන්තාවගෙන් ස්වාමි පුරුෂයා පොලිසියේදී ඉල්ලා සිටියද ඇය ඒ කෙරෙහි අවධානය යොමු නොකළ අතර ඇයට තහනම් ගහේ ගෙඩි කෑමට අවශ්‍ය විය.

තරුණියන් රවටා පැන යන වංචාකාර තරුණයින් සිටින යුගයක මෙම තරුණයා සිදුකළ උතුම් සේවාව අමතක කළ තමන්ට යම් දවසක විඳවීමට සිදුවන බව පැමිණිල්ල විභාග කළ පොලිසිය පවසා තිබේ. නමුත් ඇය ඒ කෙරෙහි ඇහුන්කන් නොදී තමාට මෙම ස්වාමියා අවශ්‍ය නොවන බව පවසා ඇත.