(මීරිගම විශේෂ පුෂ්පකුමාර මල්ලවආරච්චි)
සම වයසේ තරුණ තරුණියන් තමන්ට ‘අන්කල්’ කියා ආමන්ත්‍රණය කිරීම නිසා කෝපයටත් සිත් වේදනාවටත් පත් ඡායාරූප ශිල්පියකු පුරා දවසක් ආහාරයක් තබා වතුර උගුරක්වත් නොගෙන සිටීමේ පුවතක් ඉකුත් සති අන්තයේදී ගම්පහ දිසාවේ කෙළවර ගම්මානයකින් වාර්තා විය.

ඔහු තවමත් තරුණවිය පසු නොකළ දෙදරු පියෙකි. වෘත්තීය ඡායාරූප ශිල්පියෙකි. වයසින් මුහුකුරා නොගියත් ඔහුගේ පෙනුම තරමක් වයසැතිය. තරමක තට්ටයත් බඩත් ඒ බව පෙන්නුම් කරයි. ඔහු පසුගිය සතිඅන්තයේ දිවයිනේ ප්‍රසිද්ධ ඇඟලුම් ආයතනයක ඡායාරූප ගැනීමේ යෙදුණේ තමන් සේවය කරන ආයතනයේ උපදෙස් මතය.

උදේ අටට පමණ ඇරඹුණු රාජකාරිය අවසන් වූයේ මළහිරු බැසයාමෙන් ද පසුවය. ඔහුගේ සමීපතම මිතුරකු ඔහු ගැන සොයා බලන්නට අවස්ථා කිහිපයකදී දුරකතන ඇමතුම් දුන්නත් සම්බන්ධ කරගැනීමට බැරිවූයේ හෙතෙම කැමරාව කර පින්නාගෙන සිටීම නිසාය.සියල්ල අවසන්ව නිවස බලා යාමට සැරසුණු ඡායාරූප ශිල්පියා තමන්ට මගහැරුණු ඇමතුම් කිහිපයක් දැකීමෙන් පසු මිතුරා ඇමතීය.

‘අයියේ මට අද දවස නම් එපා වුණා. වැඬේට කීයක් ලැබුණත් මට නම් වැඩක් නැහැ. ඒ ඔක්කෝටම වඩා මට එපා වුණ වැඬේ එතන හිටපු කෙල්ලෝ කොල්ලෝ හැම එකාම මට කතා කළේ ‘අන්කල්’ කියලානේ. මගේ හිත හොඳටම රිදුනා. මම එන්නේ පුදුම හිතේ දුකකින් අයියේ. මට දුන්නු කෑම එකත් එපා කිව්වා. මම වතුර උගුරක්වත් බිව්වේ නැහැ. මට වැඩියෙන්ම දුක මට වඩා වයස අයත් මට අන්කල් කියපු එකයි.

අයියේ මෙතන කඩයක් තියෙනවා. මගේ දිව ගිලෙන්න එනවා. මොනවා හරි බීලාම ගෙදර යනවා’ කී ඡායාරූප ශිල්පියා කතාව අවසන් කළේය. කවදත් විනෝදයට බර මිතුරා වහාම මේ සිද්ධිය පැපරාසියෙකුට දැනුම් දුන්නේ ඉදිරි දිනක විනෝදයක් ලබන අදහසිනි.