තිහගොඩ පොලිස් ස්ථානයට හදිසි දුරකථන ඇමතුමක් ආවේ මධ්‍යම රාත්‍රී දොළහ ආසන්නව තිබියදීය.“අපේ ගෙදරට හොරු පැනලා වහලේ උළු අදිනවා. අනේ උදව් කරන්න” කලබලයෙන් කීවේ කාන්තා කටහඬකිනි. කවදත් මෙවන් කාර්යයට පිහිට වන පොලිස් ස්ථානාධිපති ඩී.ජී.සම්පත් සංජීව මහතා ලිපිනය ලබාගෙන අදාළ ස්ථානයට පොලිස් කොස්තාපල්වරු දෙදෙනකු ගිනිඅවි සහිතව ක්‍ෂණිකව යැවීය.


අදාළ නිවස අසලට ගියත් එහි කලබලයක් නැත. ඒත් නිලධාරීන් දෙදෙනා දොරට තට්ටුවක් දැමීය. නිදිමතේ ආ නිවෙස් ප්‍රධානියා “එහෙම දෙයක් මෙහේ වෙලා නැහැ” කීවේ දැඩි විමතියෙනි. ඒ සමඟම නිවසේ සිටි දුව “මොකද නැත්තේ මම 119ට කතා කළේ. අම්මට තාත්තට කොච්චර කිව්වත් ඇහැ ඇරියේ නෑ. දැන් උන් වහලෙ යට හැඟිලාද කොහෙද?” කීවාය.


දැඩි විද්‍යුත් අලෝක ධාරාව සහිත විදුලි පන්දමක් වහලයට එල්ල කළ විට ඉන් පැන ගියේ විශාල ප්‍රමාණයේ උගුඩුවන් දෙදෙනෙකි. “රැට දරුවො පාඩම් කරන කොට දෙමව්පියොත් ටිකක් සැලකිල්ලෙන් ඉන්නවා. නංගිත් දැන් ඉතිපිසෝ ගාථාව කියලා නිදා ගන්න” කී පොලිස් නිලධාරීන් දෙදෙනා ආපසු ගියේ“මෙහෙමත් විකාර” කියමින්ලු.