මතීෂා වීරසිංහ සහ ශෂිකා අබේරත්න

ජැන්ඩියට ඇඳගෙන මඟුලට ගිය මිතුරු කැළක් ගජයාගේ සායම ළිඳේ පාකර බසයේ නැගී හාමතේ ගිය පුවතක් මතුගම ප්‍රදේශයෙන් වාර්තා වේ. සිය මිතුරාගේ මංගල දිනයට සහභාගී වීමට ගජ මිතුරු කැල සුදානම් වුණේ නැකත් බැලූ දිනයේ සිටය. ජැන්ඩියට අඳින්න ඇඳුම් සැලසුම් කළා වගේම ලැබෙන විවේකය ගජරාමෙට සැමරීමට ඔව්හු අමතක නොකළහ. මඟුල් ගෙදර පැත්තක තබා වෙලේ පහස විඳින්න ගිය මොවුන් මධු විත තොල ගාන්න සැරසුණේ කඩිමුඩියේය.

ගැන්සියේ මහදැන මුත්තා මෙම රාජකාරිය කරන්න හොඳම තැන ළිං ගැට්ට බව යෝජනා කළේය. අනෙක් සගයෝද එය අනුමත කළේ මධුවිත තොල ගාන්න තිබූ හිදිසියත් එක්කමයි. මීවිත පදම් වීගෙන එද්දීම පුරාජේරු දොඩවමින් හිටි මහදැන මුත්තා ළිං පතුලට වැටුණේ සගයන්ගේ ඇස් උඩ යවමිනි. වෙරි මතේ සිටි සගයන් ඔහු ගොඩ ගත්තේ දැඩි පරිශ්‍රමයක යෙදීමෙනි. මඩ නැවී දිය බේරෙමින් සිටි මිතුරා දකිද්දී ඔවුන්ගේ වෙරි හිඳුණේ මඟුල් ගෙදර දවල් කෑම මේසය මතක් වීමෙනි. එහෙත් සිදුවූ ඇබැද්දියෙන් ගොඩ ඒමේ මගක් ඔවුන් කිසිවෙකුටත් නොවිණි. කෑම පැත්තක තියා, මිතුරාට ගෙනාපු තෑගිත් නොදී ළිඳෙන් නාවා ගත් මිතුරාත් එක්කම බසයක නැග නිවෙස්වලට ගියේ මනමාල මහත්තයාගේ සායම සේදේ යැයි බියෙනි.