කඹුරුපිටිය විශේෂ කේ. අජිත්.

අලු‍ත කැන්දන් ආ මනාලිය නිවැසියන්ගේ සිත දිනාගැනීමට ගොස් තිබුණු හොඳත් නැතිකර ගත් පුවතක් මාතර දිස්ත්‍රික්කයේ ගමකින් අසන්නට ලැබේ.
එක් පුතකු පමණක් සිටි එම යුවළ ජීවත්වූයේ ගැමි පරිසරයකයි. එම පුතුට විවාහයක් කර දුන් ඔවුන් ජීවත් වූයේ එකම වහලක් යටයි. අලු‍ත ගෙනා මනාලිය නිවසේ සියලු‍ කටයුතු නිරතුරුව සොයා බලා මැනවින් ඉටු කළ අතර සැමගේ ආදරයට පාත්‍ර විය. නිරන්තරයෙන් ගෘහ උපකරණ තිබෙන ස්ථාන වෙනස් කිරීම ඇයගේ පුරුද්දක් විය.
දිනක් සැමියා රැකියාවට ගොස් එන විට ඇය නිවසෙහි ඇඳ, පුටු හා මේස යනාදිය වෙනත් තැන්වල තැබීමට කටයුතු කළේ සැමියාගේද ප්‍රසංශාව හිමිවේයැයි යන සිතුවිල්ලෙනි.
තම වත්තේ වැඩ නිමකර සවස නිවසට පැමිණි මාමණ්ඩිය මල් පූජා කිරීමට පෙර දුම් ඇල්ලීම සඳහා ඇවි​ෙළන අඟු‍රු කබල ද රැගෙන දුම් අල්ලන අතරතුර, විදුලිය විසන්ධි විය. ඒ සමගම ඔහු වෙනදා පුරුද්දට එතන තිබූ පුටුවෙහි ඉඳගැනීමත් සමඟ ඔහු බිම ඇද වැටී දුම් කබලෙහි තිබූ ගිනි අඟු‍රු උඩින් ගොස් සී සී කඩ විසිරිනි. 

කවුද මෙතන තිබුණු පුටුව අයින් කළේ. “අම්මෝ මගේ කොන්ද ඉවරයි” යනුවෙන් විලාප දෙන්නට විය. මේ ශබ්දය ඇසී එතනට දිව ආ නිවැසියන්, දුටු දෙයින් විමතියටත් භීතියටත් පත්විය. “තාත්තේ මමයි මේ පුටුව අයින් කළේ. මෙහෙම දෙයක් වෙයි කියල සිතුවේ නැහැ” යි කියමින් ඔහු නැගිටුවා වෙද නිවසට රැගෙන යන ලදී.
කෙසේ වෙතත් ඔවුන් වෙදගෙදර ගොස් ප්‍රතිකාර රැගෙන නිවසට පැමිණෙන විට දුටුවේ දුම් නගිමින් තිබෙන අලු‍ත්ම සොෆා සෙටියයි. වහා ක්‍රියාත්මක වූ ඔවුන් ගින්න නිවන ගමන් පවසා සිටියේ, ‘තව ටික වෙලාවක් ප්‍රමාද වුණානම් ගේත් ගිනි ගන්නවා, ඔයින් ගියා මදැයි’ යි යනුවෙනි.