(ඩයනා උදයංගනී)

කොවිඩ් 19 වසංගත තත්ත්වයෙන් ආරක්‍ෂාවීම සඳහා ජනතාව නව සෞඛ්‍යාරක්‍ෂිත ජීවන රටාවකට හුරු විය යුතු බව සෞඛ්‍ය ප්‍රවර්ධන කාර්යාංශය පවසයි.

ඒ අනුව නිවසේදී මෙන්ම ගමන් බිමන්වලදීත්, බාහිර ස්ථාන හා රැකියා ස්ථානවලදීත් නිසි සෞඛ්‍ය පුරුදු අනුගමනය කළ යුතු බව එම කාර්යාංශය සඳහන් කරයි.

මෙහිදී හැකි සෑම විටම නිවසේ රැඳී සිටීම වැදගත් බවත් අත්‍යාවශ්‍ය කරුණකට හැර නිවසින් බැහැරවීම නොකළ යුතු බවත් ඔවුන් පවසයි.

සෞඛ්‍ය ප්‍රවර්ධන කාර්යාංශය පවසන පරිදි ඔබ නිවසේ දී අනුගමනය කළ යුතු සෞඛ්‍ය පුරුදු මෙසේය.

* ඔබට සුළු හෝ සෙම්ප්‍රතිශ්‍යා තත්ත්වයක් පවතී නම් නිවසේම රැඳී සිටින්න. නිවසේ අන් අයගෙන් වෙන්ව සිටීම හා වෛද්‍ය උපදෙස් ලබාගැනීම සිදුකරන්න.

* නිවසේ දොර ජනෙල් හැකි සෑම විටම හොඳින් වාතාශ්‍රය ලැබෙන සේ විවෘත කර තබන්න.

* පවුලේ වයස්ගත සහ නිදන්ගත රෝග ඇති සාමාජිකයන් පිළිබඳ වැඩි අවධානයක් යොමු කරන්න.

* සෞඛ්‍ය සේවා සහ අනෙකුත් සහාය සදහා වූ ජාතික හා ප්‍රාදේශීය සංවිධාන හා නිලධාරීන්ගේ වැදගත් දුරකතන අංක ලැයිස්තුවක් සාදාගන්න.

* නිවසින් පිටතට යන විට රැගෙන යන භාණ්ඩ ප්‍රමාණය අවම කරන්න.

* නිවසින් පිටතට ගොස් පැමිණි විගස දෑත්වල සබන් ගා අවම වශයෙන් තත්ත්පර 20ක් සෝදන්න.

* ඇඳ සිටි ඇඳුම් සොදා දැමීම, පිටතට රැගෙන ගිය බඩු බාහිරාදිය නිවසේ හෝ දොරටුව අසල තබා ඇති පෙට්ටියකට දමන්න.

* ජංගම දුරකතනය විෂබීජ නාශකයක් යොදා පිරිසිඳු කරන්න.

* අසල්වැසි නිවෙස්වලටයාමෙන් හා අනවශ්‍ය ඒකරාශීවීම්වලින් වළකින්න.

(සේවා ස්ථානයේදී අනුගමනය කළ යුතු කරුණු හෙට බලාපොරොත්තු වන්න)