කොන්දෙ අමාරුවලින් අද බහුතරයක්ම පීඩා විඳිති. ඒ පුරුෂ පක්ෂයටත් වඩා කාන්තා පාර්ශවයයි. කොන්දේ වේදනා, කැක්කුම් මේ සෑම දෙයකටම අපේ වැරැදි ඉරියව්, වැරැදි පුරුදු හේතු වන බව ඔබ දන්නවාද? මේ පුරුදු දිගු කාලයක් පුරාම අඛණ්ඩව සිදු වීමෙන් හානිකර ප්‍රතිඵලයද අපටමය. හිඳ ගැනීම, නිදා ගැනීම, බර දෙයක් ඉසිලීම ආදී ක්‍රියාවලදී අපි නිවැරැදි ඉරියව්වේ නොසිටියහොත් පසුකාලීනව කොන්දේ අමාරු ඇති වීමට පුළුවන.

අපි විවේකය ගත කරනවා නම් හෝ හිඳගෙන යම් කාර්යයක නිරත වනවා නම් කොන්ද සෘජුව තබා ගත යුතුමය. එසේ නැතිව බෙල්ල නමා,කොන්දත් කුදු කරගෙන අපහසුවෙන් වාඩි වී සිටීමේදී ලේ ගමනාගමනය අඩාල වී කොන්ද කැක්කුම්,බෙල්ල කැක්කුම් ඇති වීමට හැකිය.

අපි නිදා ගැනීමේදී වුවත් නිවැරැදි ඉරියව්වක සිටීමද අපට පහසුවකි. එසේම ඉක්මනින් නින්ද යාමටත් එය හේතුවකි. සමතලා නොවුණු තැනින් තැන නැමුණු මෙට්ට භාවිත කරනවා නම් එයද නුදුරු දිනයකම ඔබ කොන්ද අමාරුවලින් පෙළෙන බව අඟවන රතු එළියකි. වැරැදි ඉරියව්වකින් වැඩි කාලයක් සිටීම, එය දිගින් දිගටම සිදු වීම පුරුද්දක් වී අවසානයේදී ඊට අනුගත වූ ඔබ රෝගියකු බවට පත් කරවයි.

අපි බරැති යමක් ඉහළට එසවීමේදී වුණත් කොන්ද හොඳින් නවා දෙපා සෘජුවේ තබා ගත යුතුය. ඒවගේම අපට දරාගත හැකි බරක් පමණක් එසවිය යුතු අතර එසේ නොවීමෙන් කොන්දේ ටිෂුවලට බලපෑම් ඇති වී විවිධාකාර රෝගී තත්ත්ව පැන නැගිය හැකිය. නිවැරැදි ඉරියව්ව සැමවිටම සුව පහසු වන අතර වැරැදි ඉරියව් සේම වැරැදි පුරුදු විවිධාකාර ලෙඩ රෝගවලට අපව ගොදුරු කර ගනු ඇත.

-සටහන- මාධවී ධර්මරත්න