කොරෝනා වයිරසයෙන් බ්‍රිතාන්‍යයේ මිය ගිය පුද්ගලයන් සංඛ්‍යාව 71 දක්වා ඉහළ ගොස් ඇති අතර, 1,950දෙනෙකුට වයිරසය ආසානය වී තිබේ.

අද පමණක් පුද්ගලයන් 16දෙනෙකු මිය ගිය අතර ආසාදිතයන් 407දෙනෙකු වාර්තා වී ඇත.

ස්කොට්ලන්තය සහ වේල්සය ද සිය දෙවන කොරෝනා මරණය වාර්තා කළේය.

සෞඛ්‍ය දෙපාර්තමේන්තුව සඳහන් කළේ, එංගලන්තයේ  14දෙනෙකු  මියගොස් ඇති අතර, 1,557දෙනෙකු ආසාදිතයන් ලෙස වාර්තා වී ඇති බවය.

වේල්සයෙන් 136දෙනෙකු ද, ස්කොට්ලන්තයෙන් 195දෙනෙකුද, උතුරු අයර්ලන්තයෙන් 62දෙනෙකු ද වාර්තා වේ. 50,000කට අධික පිරිසක් වයිරසය සම්බන්ධයෙන් පරීක්ෂාවට ලක් කර ඇත.

බ්‍රිතාන්‍යයේ වයිරසය ආසාදනය වී මිය ගිය ලාබාලතම පුද්ගලයා ලෙස සැලකෙන්නේ එංගලන්තයේ 45 හැවිරිදි අයෙකි.

මේ වනවිට එංගලන්තයේ ආසාදිතයන් රට පුරා ව්‍යාප්තව ගොස් ඇතැයි වාර්තා වේ. ඩඩ්ලි  නගරයෙන් දෙදෙනෙකුද, ලන්ඩන් නුවර දෙදෙනෙකුද, යෝක්ෂයර් ප්‍රාන්තයේ තිදෙනෙකුද, කෙටෙරින් හි එක් අයෙකු සහ චෙෂයර් එක් අයකු වශයෙනි.

බ්‍රිතාන්‍ය අගමැති බෝරිස් ජොන්සන් මහතා පසුගිය රාත්‍රියේදී බ්‍රිතාන්‍යයට ඇතුළු වීම සහ පිටවීම තහනම් කරමින්  හුදකලා නගරයක් බවට පත්කිරීමට උපදෙස් ලබාදුන් අතර, වයිරසය තවත් මාස 18ක පමණ කාලයක් බලපැවැත්වෙනු ඇති බවද පැවසීය.

අවුරුදු 70ට වැඩි පිරිසට සහ ඇදුම, හෘද රෝග, වකුගඩු රෝග ආදී අසනීප තත්වයෙන් පසුවන පුද්ගලයන්ට සෙසු පුද්ගලයන් සමග ගනුදෙනු නොකරන ලෙස දැනුම් දී ඇත.