(නයෝමි දිල්රුක්ෂි)

කෑගල්ලේ කොරෝනා ආසාදිතයකු,  භාවිත කළ ඉන්හේලරයක්(ස්වසන ආධාරකයක්) ඉල්ලා, භාවිත කළ අසල්වැසි නිවසක හිමිකරු ඇතුළු පවුලේ සාමාජිකයන් ස්වයං නිරෝධායනයට යොමු කළ බව කෑගල්ල  සෞඛ්‍ය වෛද්‍ය නිලධාරි කාර්යාලයේ මහජන සෞඛ්‍ය පරීක්ෂක ඩබ්ලිව්. ඵම්. අමරතිලක මහතා කීවේය.

කොරෝනා ආසාදිතයා කෑගල්ල නගරයේ  ආපනශාලා සේවකයකු වන අතර, ඔහුට තිබූ කැස්ස සහ සෙම අසනීප තත්වයක් හේතුවෙන් අසල්වැසි නිවසක පුද්ගලයකුගේ ඉන්හේලරයක්(ස්වසන ආධාරකයක්) ඉල්ලා  තිබිණි. අසල්වැසි  නිවසේ හිමිකරුට  කාලයක් තිස්සේ කැස්ස සහ සෙම තත්වයක්  පවතින  බවත්,  ඔහු  ඉන්හේලරයක්  භාවිතා කරන බවත් මෙම සේවකයා දැන  සිට ඇත.

ආසාදිතයා එම ඉන්හේලරය ඉල්ලා එය භාවිතා කළ ද, අසල්වැසි නිවැසියා මෙම සේවකයා ආසාදිතයකු බව නොදැන සිට බව අනාවරණය වී ඇත.  එබැවින් සේවකයා භාවිත කළ ඉන්හේලරය යළි ඔහු භාවිතයට ගෙන තිබේ.

ආසාදිත සේවකයාට සිදුකළ පී.සී.ආර් පරීක්ෂණයේදී  කොරෝනා වයිරසය ආසාදනය වී ඇති බවට තහවුරු වී තිබේ. ඒ සමග  ආපනශාලාව  වසා දමා  එම සේවකයා  කෝවිඩ් නිවාරණ මධ්‍යස්ථානයක් වෙත  යොමු  කිරීමට   කටයුතු සුදානම් කර තිබුණ බව මහජන සෞඛ්‍ය පරීක්ෂක ඩබ්ලිව්. එම්. අමරතිලක මහතා වැඩිදුරටත් පැවසීය.

මේ හේතුවෙන් එම නිවැසියා ඇතුළු ඔහුගේ පවුලේ සාමාජිකයින් ද ස්වයං නිරෝධායනයට යොමුකළ බව කෑගල්ල සෞඛ්‍ය වෛද්‍ය නිලධාරි කාර්යාලය වැඩිදුරටත් පැවැසීය.