මෙරටට පසුගිය වසරේදී ආනයනය කරන ලද ටින් මාළු ප්‍රමාණය 2015 වසර හා සැසඳීමේදී සියයට 16.2කින් පහත වැටී ඇතැයි ධීවර හා ජලජ සම්පත් සංවර්ධන අමාත්‍ය මහින්ද අමරවීර මහතා පැවැසීය.

වසර 2016 ප්‍රගති සමාලෝචන රැස්වීමකට එක්වෙමින්  ඇමැතිවරයා කීවේ ආනයනික මාළු කිලෝවක මිල රුපියල් 102ක් වූ බවත් ආනයනික මාළු කිලෝවක් සඳහා පනවා තිබූ විශේෂ වෙළෙඳ බදු මුදල 2015 ජනවාරි මස සිට අඩු කිරීමත් සමඟ 2015 වසරේදී ටින් මාළු ආනයනය ඉහළ ගිය බවත් ය. එසේ විශේෂ වෙළෙඳ බදු මුදල අඩු කළ ද 2016 වසරේදී ටින් මාළු ආනයනය සියයට 16.2කින් පහත වැටී ඇතැයි  අමරවීර මහතා කීවේය.

වසර 2016 දී මෙරටට ආනයනය කර ඇති ටින් මාළු ප්‍රමාණය මෙට්‍රික් ටොන් 29,994කි. ධීවර හා ජලජ සම්පත් සංවර්ධන අමාත්‍යාංශය නිකුත් කළ ‘ධීවර සංඛ්‍යා දත්ත 2016’ වාර්ෂික වාර්තාවට අනුව 2015 වසරේදී මෙරටට ආනයනය කරන ලද ටින් මාළු ප්‍රමාණය මෙට්‍රික් ටොන් 49,016ක් වන අතර 2014 හා 2013 වසරවලදී පිළිවෙළින් ටින් මාළු මෙට්‍රික් ටොන් 19,591ක් හා 21,835ක් ආනයනය කර ඇත.