Alumexසමාගම සම්මාන 14කට අධික ගණනක් දිනා ගනිමින් 2023 වසර  අතිසාර්ථක අන්දමින් අවසන් කළ අතර එම ජයග්‍රහණයන් ඔස්සේ මෙරට අපනයන ක්ෂේත්‍රය කෙරෙහි මෙන්ම එහි තිරසාරභාවය සහ ව්‍යාපාරික විශිෂ්ටත්වය සඳහා දක්වන ලද කැපවීම මැනවින් තහවුරු වූ බව එම සමාගම කියයි.

2023 වසරේ පැවැති 25 වැනි ජනාධිපති අපනයන සම්මාන උළෙලේදී ‘2021/2022 වසරේ සමස්ත නැගී එන අපනයනකරු’ යන ගෞරව නාමයෙන් සහ 'Light Engineering'අංශයේ කුසලතා සම්මානයෙන්   Alumexපිදුම් ලැබූ අතර එමඟින් මෙම සමාගමේ විශිෂ්ටත්වය මෙන්ම නොසැලෙන කැපවීම පිළිබිඹු විය. එමෙන්ම 31 වැනි NCE අපනයන සම්මාන උළෙලේදී ‘යන්ත්‍රෝපකරණ සහ සැහැල්ලු‍ ඉංජිනේරු අංශයේ’ රිදී පදක්කම ද Alumexවෙත හිමිවීම සුවිශේෂී ජයග්‍රහණයකි.

මේ පිළිබඳව අදහස් දක්වමින් Alumexහි කළමනාකාර අධ්‍යක්ෂ ප්‍රමුක් දැදිවෙල මහතා මෙසේ ප්‍රකාශ කළේය. ‘‘ඇලු‍මිනියම් නිෂ්පාදන කර්මාන්තය තුළ අඛණ්ඩ පුරෝගාමී කාර්යභාරයක් ඉටු කරමින් විශිෂ්ටත්වය සහ නවෝත්පාදනය පිළිබඳව නව ප්‍රමිතීන් රැසක් ස්ථාපිත කිරීමට අපි කටයුතු කළා. නවීන තාක්‍ෂණය සහ තිරසාර භාවිතයන් වෙත නැඹුරුවීමේ අපගේ ක්‍රියාකාරී ප්‍රවේශය අන්තර්ජාතික වෙළෙඳපොළ තුළ අපගේ මුද්‍රාව සනිටුහන් කරමින් දේශීය  අපනයන ආදායම ඉහළ නැංවීම සඳහා  දායකත්වය ලබාදීම කෙරෙහි හේතු වී තිබෙනවා .”‍

Alumexසමාගම 2019 වසරේ සිට සිය උසස් තත්වයේ ඇලු‍මිනියම් නිෂ්පාදන සමඟ ශ්‍රී ලංකා අපනයන ක්ෂේත්‍රයේ නව අපනයන නිෂ්පාදන කාණ්ඩයක් ස්ථාපිත කිරීමට පුරෝගාමී මෙහෙවරක් ඉටු කර ඇත.  පසුකාලීනව ඔවුන් අන්තර්ජාතික වෙළෙඳපොළ වෙතද සිය නිෂ්පාදන බෙදාහරිමින්  ජාත්‍යන්තර වෙළෙඳපොළ තුළ සිය සන්නාමය සාර්ථකව ගොඩනංවන ලදී.

Alumexසතු උපායමාර්ගික දැක්ම සහ මෙහෙයුම් හැකියාව කැනඩාව, එක්සත් ජනපදය, එක්සත් රාජධානිය, ජර්මනිය, ඉතාලිය, නවසීලන්තය, ඕස්ට්‍රේලියාව සහ සිංගප්පූරුව ඇතුළු රටවල් රැසක ජාත්‍යන්තර වෙළෙඳපොළ වෙත සිය නිෂ්පාදන සැලකිය යුතු ප්‍රමාණයක්   අපනයනය කිරීම කෙරෙහි ඉවහල් වී තිබේ.