සතියේ කොටස් වෙළෙඳපොළ විමසුම: දේශීය-ගෝලීය දේශපාලන ප්‍රවණතා මැද කොළඹ කොටස් වෙළෙඳපොළේ උච්චාවචන

බන්දුල ලංසකාර 
ජ්‍යෙෂ්ඨ කළමනාකරු- කොටස් ආයෝජන සෙන්ෆින් සිකියුරිටීස් ලිමිටඩ්

පසුගිය ඔක්තෝබර් 30 වැනි සිකුරාදා සිට නොවැම්බර් 04 වැනි බදාදා දක්වා දින 4ක කාලය තුළ කොළඹ කොටස් වෙළෙඳපොළ (CSE) කැපී පෙනෙන උච්චාවචන රැසකට මුහුණ දුන්නේය. ගෝලීය භූ-දේශපාලනික තත්වය, විශේෂයෙන්ම මැදපෙරදිග ආතති ලිහිල් වීම සහ ඇමෙරිකානු ජනාධිපතිවරණ ප්‍රතිඵල පිළිබඳ දේශීය හා විදේශීය ආයෝජකයන්ගේ ප්‍රතිචාර මීට සෘජුවම බලපෑවේය.

ඔක්තෝබර් 30 (සිකුරාදා) - මිල දර්ශකවල පහත වැටීමක්

සතිය අවසානයේ ප්‍රධාන මිල දර්ශක දෙකම සෘණාත්මක අගයක් ගත්තේය. සියලු‍ කොටස් මිල දර්ශකය (ASPI) ඒකක 124.82 කින් (0.62%) පහත වැටී ඒකක 20,142.33 ක් ලෙස සටහන් වූ අතර, S&P SL20 දර්ශකය ඒකක 23.28 කින් (0.40%) පහත වැටී ඒකක 5,746.40 ක් විය. එදින දෛනික සමස්ත පිරිවැටුම රුපියල් මිලියන 958.55 ක් වූ අතර, කොටස් මිලියන 48.6ක් ගනුදෙනු විය. සමස්ත වෙළෙඳපොළ ප්‍රාග්ධනීකරණය රුපියල් ට්‍රිලියන 7.25ක් ලෙස සටහන් විය.

විදේශීය ආයෝජකයන් එදින රුපියල් මිලියන 72.33ක ශුද්ධ විකුණුම්කරුවෝ (Net Sellers)  ලෙස කටයුතු කළහ. වෙළෙඳපොළ පහත වැටුණද යූනියන් ඇෂුවරන්ස් (4.08%), ඩිස්ටිලරීස් (1.10%), ලංකා දුම්කොළ සමාගම (0.59%) සහ ජෝන් කීල්ස් හෝල්ඩින්ග්ස් (0.55%) දර්ශකයට ධනාත්මක දායකත්වයක් සැපයීය.

ආයතනික නිවේදන: නේෂන්ස් ට්‍රස්ට් බැංකුව (NTB)  සියයට 100 ක පූර්ණ අනුබද්ධිත සමාගමක් වන ‘Waldock Mackenzie Limited’  ස්වේච්ඡාවෙන් ඈවර කිරීමට අධ්‍යක්ෂ මණ්ඩල අනුමැතිය දුන් අතර, සැම්පත් බැංකුව නව ණයකර නිකුතුවක් ප්‍රකාශයට පත් කළේය. බෙයිරහා ෆාම්ස්, සන්ෂයින් හෝල්ඩින්ග්ස්, කීල්ස් ෆුඩ් සහ සිලෝන් කෝල්ඩ් ස්ටෝර්ස් සමාගම් අතුරු ලාභාංශ ප්‍රකාශ කළේය. සොෆ්ට්ලොජික් ෆිනෑන්ස් හි තාවකාලිකව අත්හිටුවා තිබූ කොටස් ගනුදෙනු නැවත ආරම්භ විය.

නොවැම්බර් 02 (සඳුදා) - විකිණුම් පීඩනය මැද දිගින් දිගටම පහතට

නව සතියේ ආරම්භක දිනයේදීද මුල් භාගයේ පැවති මිලදී ගැනීමේ උනන්දුව සවස වන විට වියැකී යාම හේතුවෙන් මිල දර්ශක තවදුරටත් පහත වැටුණි. ASPI  දර්ශකය ඒකක 62.78 කින් (0.31%) පහත වැටී 20,079.55 සීමාවට පැමිණි අතර, S&P SL20  දර්ශකය ඒකක 44.54 කින් (0.78%) සෘණාත්මකව 5,701.86 ලෙස අවසන් විය.

එදින පිරිවැටුම රුපියල් මිලියන 921.22 ක මට්ටමක පැවති අතර, එය වසරේ දෛනික සාමාන්‍යයට වඩා බෙහෙවින් අඩු අගයකි. බැංකු ක්ෂේත්‍රයේ කොටස් වැඩිපුරම ගනුදෙනු වූ අතර, සැම්පත් බැංකුව රුපියල් මිලියන 319.42ක ඉහළම පිරිවැටුම වාර්තා කළේය. විදේශීය ආයෝජකයන් රුපියල් 948,227 ක සුළු ශුද්ධ විදේශීය පිටතට ගලායාමක් සටහන් කළේය.

ආයතනික නිවේදන: Chrissworld PLC  සමාගමේ සියයට 64.53 ක ප්‍රධාන කොටස් හිමිකාරිත්වයක් නව ආයෝජකයන් තිදෙනකු විසින් රුපියල් 12 බැගින් මිලදී ගන්නා ලදී. හොරණ ප්ලාන්ටේෂන්ස් සහ යූනියන් කෙමිකල්ස් ලංකා සමාගම් සිය මූල්‍ය වාර්තා වෙළෙඳපොළට ඉදිරිපත් කළේය.

නොවැම්බර් 03 (අඟහරුවාදා) - රුපියල් බිලියන 1.5ක පිරිවැටුමක් සමග ධනාත්මක සීමාවට

අඟහරුවාදා දින ආයෝජකයන්ගේ සාධනීය හැසිරීම හේතුවෙන් වෙළෙඳපොළ නැවතත් වර්ධනීය මාවතකට අවතීර්ණ විය.  ASPI  දර්ශකය ඒකක 40.09 කින් (0.20%) ඉහළ ගොස් 20,119.64 ක් වූ අතර, S&P SL20  දර්ශකය ඒකක 20.71 කින් (0.36%) ඉහළ ගොස් 5,722.57 ක් ලෙස සටහන් විය.

එදින පිරිවැටුම රුපියල් බිලියන 1.52 දක්වා කැපී පෙනෙන ලෙස ඉහළ ගියේය. දේශීය ආයෝජකයන් රුපියල් බිලියන 1.49ක මිලදී ගැනීම් කරමින් වෙළෙඳපොළ මෙහෙයවූ අතර, විදේශීය ආයෝජකයන් රුපියල් මිලියන 242.47ක ශුද්ධ විකුණුම් වාර්තා කළේය. ඩයලොග් ඇක්සියාටා (1.39%), ඕවර්සීස් රියල්ටි (1.67%) සහ සොෆ්ට්ලොජික් කැපිටල් (7.87%) දර්ශකයේ වර්ධනයට මූලික විය. PickMe  (රු. මිලියන 246) සහ නේෂන්ස් ට්‍රස්ට් බැංකුව (රු. මිලියන 52) ඉහළම පිරිවැටුම් දායකත්වය ලබා දුන්නේය.

ආයතනික නිවේදන: ජෝන් කීල්ස් හෝල්ඩින්ග්ස් ((JKH)  සමාගම සිය පූර්ව බදු ලාභය සියයට 39 කින් වර්ධනය කරගනිමින් කොටසකට රුපියල් 25ක අතුරු ලාභාංශ ප්‍රකාශ කළේය. මීට අමතරව සිලෝන් බෙවරේජ් හෝල්ඩින්ග්ස් ද ලාභාංශ ප්‍රකාශයට පත් කළේය.

නොවැම්බර් 04 (බදාදා) - ඇමෙරිකානු මැතිවරණ උණුසුම මැද රුපියල් බිලියන 3.8ක දැවැන්ත පිම්මක්

ඇමෙරිකානු මැතිවරණ ප්‍රතිඵල නිකුත් වීමත් සමග ඇති වූ ගෝලීය උත්තේජනය සහ දේශීය මැතිවරණ බලාපොරොත්තු හේතුවෙන් බදාදා දින කොළඹ කොටස් වෙළෙඳපොළ ඉතිහාසගත දැවැන්ත වර්ධනයක් සටහන් කළේය. සමස්ත වෙළෙඳපොළ ප්‍රාග්ධනීකරණය තනි දිනක් තුළ රුපියල් බිලියන 156.28 කින් ඉහළ ගොස් රුපියල් ට්‍රිලියන 7.4 සීමාවට ළඟා විය.

ASPI  දර්ශකය ඒකක 421.48 කින් (2.09% ක දැවැන්ත පිම්මක්) ඉහළ ගොස් ඒකක 20,541.12ක් ලෙසද,S&P SL20  දර්ශකය ඒකක 112.52 කින් (1.97%) ඉහළ ගොස් 5,835.09 ලෙසද වාර්තාගත ලෙස අවසන් විය. දෛනික පිරිවැටුම රුපියල් බිලියන 3.87 දක්වා ශීඝ්‍රයෙන් ඉහළ ගිය අතර කොටස් මිලියන 119.4ක් හුවමාරු විය.

■ ඉහළ ගිය සමාගම් (Top Gainers):  හැටන් නැෂනල් බැංකුව (රු. මිලියන 754.7), සිංගර් ශ්‍රී ලංකා (රු. මිලියන 428), එල්.ඕ.එල්.සී (රු. මිලියන 177) සහ ටෝකියෝ සිමෙන්ති (රු. මිලියන 115) ඉහළම ලාභ ලැබූ සමාගම් අතර විය.

■ පහළ ගිය සමාගම් (Top Losers):  කොළඹ ෆෝට් ලෑන්ඩ් ඇන්ඩ් බිල්ඩින්ග් (-3.86%) සහ සර්වෝදය ඩිවෙලොප්මන්ට් ෆිනෑන්ස් (-3.75%) සුළු වශයෙන් පහත වැටුණි.

■ විදේශීය සහභාගිත්වය: විදේශීය ආයෝජකයන් රුපියල් මිලියන 158.8ක ශුද්ධ විකුණුම් සිදු කළ අතර, දේශීය ආයෝජකයෝ රුපියල් බිලියන 3.84ක මිලදී ගැනීම් සිදු කළහ.

නොවැම්බර් 05 (බ්‍රහස්පතින්දා) - ඉතිහාසගත වර්ධනය තවදුරටත් ඉදිරියට (Latest Updates) 

බදාදා ආරම්භ වූ දැවැන්ත මිලදී ගැනීමේ රැල්ල අද දිනත් ඉතා සක්‍රීයව ඉදිරියට ගියේය. දිනය අවසානයේ සියලු‍ කොටස් මිල දර්ශකය (ASPI)  තවදුරටත් ඒකක 589.18කට ආසන්න මට්ටමකින් ඉහළ යමින් ඒකක 21,200 සීමාව අභිබවා යාමට සමත් විය. මීට සාපේක්ෂව වඩාත් ද්‍රවශීලී සමාගම් නියෝජනය කරනS&P SL20  දර්ශකයද ඒකක 6,061 සීමාව ආසන්නයට පැමිණියේය. පිරිවැටුම රුපියල් බිලියන 5.4 ඉක්මවා වාර්තා විය. 

■ ඉහළ ගිය සමාගම් (Top Gainers):  අද දිනත් දර්ශකයේ ඉදිරියෙන්ම සිටියේ ඩයලොග් ඇක්සියාටා (+3.33%), කොමර්ෂල් බැංකුව (+1.86%), හේලීස් (+3.95%), එල්.ඕ.එල්.සී හෝල්ඩින්ග්ස් (+6.06%) සහ හැටන් නැෂනල් බැංකුව (+1.30%) යන ප්‍රමුඛ පෙළේ සමාගම්ය.

පහළ ගිය සමාගම් (Top Losers):  එස්.එම්.බී ෆිනෑන්ස් (-10.00%), ෆස්ට් කැපිටල් ට්‍රෂෙරීස් (-0.80%) සහ ලු‍මිනෙක්ස් (-2.38%) සමාගම්වල මිල පහත වැටුණි.