ශ්‍රී ලංකා කලාපීය ඇඟලුම් අපනයනකරුවන්ගේ සංගමය (SLCGE) හි උසස් මට්ටමේ නියෝජිත පිරිසක්, කර්මාන්ත හා ව්‍යවසාය සංවර්ධන නියෝජ්‍ය අමාත්‍ය චතුරංග අබේසිංහ මහතා හමුවී SLCGE Design Hub පිහිටුවීම සඳහා වන උපායමාර්ගික යෝජනාව නිල වශයෙන් භාර දුන්හ.
මෙම නියෝජිත පිරිස SLCGE සභාපති නිශාන්ත බක්මීගේ මහතාගේ නායකත්වයෙන් සමන්විත වූ අතර සංගමයේ නිලධාරීන් වන Jeremy Enas, Menuka Gunawardana සහ Shehan Olegasageram යන මහත්වරු ද සහභාගී වූහ.
යෝජිත SLCGE Design Hub ව්‍යාපෘතිය ශ්‍රී ලංකාවේ ඇඟලුම් කර්මාන්තයට අලුත්ම සහ ප්‍රථම වරට ක්‍රියාත්මක වන පුරෝගාමී වැඩසටහනක් ලෙස සැලකේ. මෙම සංකල්පයෙන් SME ඇඟලුම් නිෂ්පාදකයන්ගේ කුසලතා, නිර්මාණාත්මකභාවය සහ පුළුල් නිෂ්පාදන පරාසය එකම මධ්‍යස්ථානයක් තුළ ප්‍රදර්ශනය කිරීම සඳහා ඒකාබද්ධ වේදිකාවක් නිර්මාණය කිරීමට අදහස් කරයි. මෙම මධ්‍යස්ථානය විදේශීය ඇඟලුම් ගැනුම්කරුවන් සඳහා එක් ස්ථානයකින් සියලුම සේවා ලබාගත හැකි One Stop Destination එකක් ලෙස ක්‍රියාත්මක වීමට සැලසුම් කර ඇත. එමගින් සෘජු ව්‍යාපාරික සම්බන්ධතා ඇති කිරීම, වෙළෙඳපොළ ප්‍රවේශය පුළුල් කිරීම සහ SME අංශයේ අපනයන අවස්ථා වර්ධනය කිරීම අරමුණු කරගනී.
මෙම වැඩසටහන යටතේ සියලුම සාමාජික නිෂ්පාදකයන්ගේ හැකියාව එක් වේදිකාවකට එක්කරමින්, ජාත්‍යන්තර වෙළෙඳපොළේ ශ්‍රී ලංකා ඇඟලුම් ක්ෂේත්‍රයේ දෘශ්‍යතාව සහ තරගකාරිත්වය ශක්තිමත් කිරීමට අපේක්ෂා කෙරේ. මෙය රටේ අපනයන ආදායම ඉහළ නැංවීමටද ජාතික ආර්ථික සංවර්ධන ඉලක්කවලටද සැලකිය යුතු දායකත්වයක් ලබා දීමට හැකි වනු ඇත. එමෙන්ම මෙම වැඩසටහන ජාතිකව නියම කර ඇති අපනයන ආදායම් ඉලක්ක සමග සෘජුව ගැළපීම සඳහා විශාල හැකියාවක් සහ උපායමාර්ගික වැදගත්කමක් දරන බවද සැලකේ. සාකච්ඡා අතරතුර නියෝජ්‍ය අමාත්‍යවරයා මෙම යෝජනාවට ධනාත්මක සහ උනන්දුවක් දක්වන ප්‍රතිචාරයක් ලබා දුන් අතර, එය ජාතික කාර්මික පරිවර්තනය සහ SME වර්ධනය සඳහා වන ප්‍රතිපත්තිමය අරමුණු සමඟ ගැළපෙන නවෝත්පාදනමය වැඩසටහනක් ලෙස පිළිගත්තේය.