ශ්‍රී ලංකන් ගුවන් සේවය 2021 දෙසැම්බර් මාසය සඳහා ඩොලර් මිලියන 9.25 ක සමාගම් ලාබයක් සහ ඩොලර් මිලියන 10.66 ක සමූහ ලාබයක් වාර්තා කර ඇතැයි නිවේදනයක් නිකුත්කරමින් ශ්‍රී ලංකන් ගුවන් සමාගම සඳහන් කරයි. 2020 මුල් භාගයේ කොරෝනා වසංගතය ආරම්භයේ සිට ගුවන් සමාගමට ලාබ හිමි වූ පළමු මාසය ගෙවුණු දෙසැම්බර් මාසය බවද එම නිවේදනයේ සඳහන්ය.

පෙර වසරේ එම කාලය හා සසඳන විට සමාගමේ ආදායම සියයට 200 කින් පමණ ඉහළ ගොස් ඇති බවත් පූර්ව වසංගත මට්ටම හා සසඳන විට එය ආදායම සියයට 80 ක් ඉක්මවා යාමක් බවද ශ්‍රී ලංකන් ගුවන් සමාගම පෙන්නා දෙයි. පසුගිය දෙසැම්බර් මාසය සඳහා ගුවන් ප්‍රවාහන මට්ටමින් ඇමෙරිකන් ඩොලර් මිලියන 11.43 ක ලාබයක් වාර්තා කර ඇති බව සඳහන් කරන ශ්‍රී ලංකන් ගුවන් සමාගම එය වසර 20 කට වැඩි කලයක් තුළ ගුවන් ප්‍රවාහනයෙන් වාර්තාවූ ඉහළම ලාබය බවද පෙන්වා දෙයි.

මාසයක් තුළ ගුවන් ගමන් 800 කට ආසන්න සංඛ්‍යාවක් ක්‍රියාත්මක කර ඇති ශ්‍රී ලංකන් ගුවන් සේවාව මගීන් 288,203 ක් ප්‍රවාහනය කර ඇතැයිද එය 2020 දෙසැම්බර් මාසයේදී ගෙනයන ලද මගී සංඛ්‍යාව මෙන් දහතුන් ගුණයකටත් වඩා වැඩි බවද ශ්‍රී ලංකන් ගුවන් සමාගම සඳහන් කරයි. ශ්‍රී ලංකන් ගුවන් භාණ්ඩ අංශය මුළු භාණ්ඩ ප්‍රවාහනය මෙට්‍රික් ටොන් 7,877 ක් දක්වා ඉහළ නංවාගෙන ඇති අතර එය 2020 දෙසැම්බර් මාසයේ සිට සියයට 147 ක වැඩිවීමක් බවද එම සමාගම සඳහන් කරයි.

ගුවන් සමාගමේ කාර්ය මණ්‍ඩලයේ සියලු දෙනා කළ කැපකිරීම නව වසරේ සුබවාදී ආරම්භයකට මගපාදා ඇතැයි නව මුල්‍ය ප්‍රතිඵල සම්බන්ධයෙන් අදහස් දක්වන ශ්‍රී ලංකන් ගුවන් සමාගමේ සභාපති අශෝක් පතිරගේ මහතා සඳහන් කළේය.

වැඩිදුරටත් අදහස් දැක්වූ ඒ මහතා මෙසේ ද සඳහන් කළේය.

පසුගිය දෙවසර තුළ අපි මෙහෙයුම් පිරිවැය අවම කිරීම සඳහා බහුවිධ මූලපිරීම් ක්‍රියාවට නැංවූවා. ඒ සඳහා ශ්‍රී ලංකන් පවුලේ සෑම සාමාජිකයකුම දායකවූවා. අපගේ එම උත්සාහයේ ප්‍රතිඵල අද අපි භුක්ති විඳිනවා. කෙසේ වෙතත් වයිරසයේ නව ප්‍රභේදය ව්‍යාප්තවීමත් සමග අනාගතය අතිශය අභියෝගාත්මක වනු ඇති. දෙසැම්බර් මාසයේ ලබාගත් ආරම්භය දිගටම පවතින බව සහතික කිරීමට පවතින තත්ත්වය සමීපව නිරීක්ෂණය කරමින් සිටිනවා වගේම අවශය ක්‍රියාමාර්ග ගනු ලබනවා

වසංගතයේ දුෂ්කරතා මධ්‍යයේ වුවද, ජාතික ආර්ථිකයට සහාය වීම, සංචාරක ව්‍යාපාරය නංවාලීම, නව ව්‍යාපාර සම්බන්ධ කිරීම, භාණ්ඩ ප්‍රවාහනය සහ විදේශ විනිමය ඉපැයීම සඳහා ශ්‍රීලංකන් සිය කැපවීම ලබා දී තිබේ. පසුගිය වසරේ, ශ්‍රීලංකන් සෝල්, නයිරෝබි; මොස්කව්; පැරිස්; සහ කත්මණ්ඩු ඇතුළු නව ගමනාන්ත කිහිපයකට මෙහෙයුම් දියත් කළේය.  ගුවන් සේවය පැරිසියේ IFTM Top Resa සහ මොස්කව්හි OTDYKH LEISURE වැනි ජාත්‍යන්තර සංචාරක වෙළඳ ප්‍රදර්ශනවලට සහභාගී වීම ඇතුළුව අදාළ වෙළඳපල තුළ අලෙවිකරණ මුලපිරීම් හරහා නව ගමනාන්ත ප්‍රවර්ධනය කරන ලදී. පසුගිය වසරේ රුසියාව, ප්‍රංශය සහ ඉන්දියාව පදනම් කරගත් සංචාරක වෙළඳ මාධ්‍යවේදීන් සඳහා (FAM) සංචාරයක් පැවැත් වූ පළමු ගුවන් සමාගම බවටද ශ්‍රී ලංකන් පත් විය. මෙම මුලපිරීම්වල ප්‍රතිඵලයක් ලෙස 2021 නොවැම්බර් මාසයේ දී මෙරටට සංචාරක පැමිණීම් 44,000 දක්වා ඉහළ ගියේය.