(හේමලතා ඞී හේවගේ )

පන්නල ප‍්‍රාදේශීය ලේකම් කොට්ඨාශයට අයත්  මාකඳුර කුඹුරුයායේ මෙවර මාස් කන්නයේ වී අස්වනු නෙලීමෙන් පසු  එම අස්වැන්න සාධාරණ මිලකට අලෙවි කරගැනීමට නොහැකිවී ඇතිබව ගොවීහු කියති.

වෙළඳපොලේ සම්බා සහල් කිලෝවක මිල රුපියල් 130 ත් 140 ත් අතර  වූවද , ගොවීන්ගෙන් මිලදී ගනුයේ  කිලෝවක් රුපියල් 40 ත් 42 ත් වැනි  අඩු මිලකට බවත්, සම්බා වී කිලෝව රුපියල් 52 කට 53 ට මිලදී ගන්නා බව රජයෙන් පැවසූව ද එය එසේ නොවන බවද ඔවුහු චෝදනා කරති.

අක්කර 1,500 කට ආසන්න ප‍්‍රමාණයකින් සමන්විත මෙම කුඹුරුයායේ 80 % පමණ වී අස්වැන්නක් මෙවර මාස් කන්නයෙන් ගොවීන්ට ලැබී ඇතත් ඒවා අලෙවිකරගැනීමේදී රජයේ වී මිලදී ගැනීමේ මධ්‍යස්ථානයක් කටුගම්පොල මැතිවරණ කොට්ඨාශයේ නොමැතිකමද , ප‍්‍රධාන පෙලේ වී ගැණුම්කරුවන් කිහිපදෙනෙකු විසින් වී මිල පාලනය කිරීම හේතුවෙන් ද  සෑම කන්නයකදීම ගෝවීන්ට මෙම ගැටඵවට මුහුණදීමට සිදුවන බවද ඔවුන් කියති.

සහතික මිලට වී මිලදී ගැනීමේ මධ්‍යස්ථානයක් කඩිනමින් මෙම ප‍්‍රදේශයේ  ස්ථාපිත කරන ලෙස  රජයෙන් සහ අදාල අංශවලින් ඉල්ලා සිටින බවත් , එතුළින් පාරිභෝගිකයින්ට සහන මිලකට සහල් ලබා ගැනීමට  හැකිවෙනු ඇතිබවත් ඔවුහු කියති.

වී අස්වනු අලෙවි කිරීමේදී  ගෝවීන් මුහුණ පාන ගැටඵව සම්බන්ධයෙන් නාපොකුණ ගොවි සංවිධානයේ සභාපති වී මූ අබේරත්න මහතා මෙසේ කීය.

අද මේ පිටිගල් කෝරලයේ තියෙන්නේ වී මිලදී ගැනීමේ මාෆියාවක්. මොකද අපෙන් වී අඩු මිලට අරගෙන පාරිභෝගිකයන්ට සහල් වැඩි මිලට විකුණනවාග මේ තත්වය නැති කරන්න රජය මැදිහත් වෙන්න  ඕනෑ.
 ගොවියාට සාධාරණයක් මෙන්ම  පාරිභෝගිකයාටත් අඩු මිලට සහල් ලැබිය යුතුයි. ඒ සඳහා රජය වී මිලදී ගැනීමේ මධ්‍යස්ථානයක් ආරම්භ කිරීම කළයුතුයි.

 මාකඳුර යායේ ගොවිමහතකු වන කමල් දර්ශන මහතා

මේ වසරේ මාස්කන්නයේ අස්වැන්න නෙලීම කටුගම්පොල මැතිවරණ කොට්ඨාශයේ මාකඳුර කුඹුරු යායෙන් මේ වනවිට ආරම්භවෙලා තියෙනවා. අක්කර 1500 කට ආසන්න ප‍්‍රමාණයක් මෙවර වගාකරලා තියෙනවා. ගොවීන්ට හොඳ අස්වැන්නක් ලැබිලා තියෙනවා. මේ වෙද්දි අපේ රටේ වෙළඳපොලේ සම්බා සහල් කිලෝවක මිල පවතින්නේ රුපියල් 130 ත් 140 ත් අතර මිලක.නමුත් අපෙන් වී මිලදී ගන්නේ කිලෝවක් රුපියල් 40 ත් 42 ත් වගේ අඩු මිලකට. රජයෙන් කියනවා සම්බා වී කිලෝව රුපියල් 52 කට 53 ට ගන්නවා කියලා. නමුත් මේ කටුගම්පොල ආසනයේ රජයේ වී මිලදී ගැනීමේ මධ්‍යස්ථානයක් නැහැ. පුද්ගලික මෝල් හිමියෝ විතරක් ඉන්න නිසා කිසිම තරඟකාරිත්වයක් නැහැ. ඔවුන් ගොවියන්ගේ වී ටික ඉතා අඩුවට තමයි මිලදී ගන්නේ.