හිරු සමීපයට යානයක් යැවීමට නාසා සැරසෙයි

නාසා ආයතනයේදීය (ඒ.එෆ්.පී)

තරු නිර්මාණය වූයේ කෙසේ ද යන්න මූලික අරමුණ කරගනිමින් හිරුගේ වායුගෝලයට යානයක් යැවීමට නාසා ආයතනය සූදානම් වෙයි.

හිරුගේ සමීපයට යානයක් යැවෙන මෙම අවස්ථාව ඓතිහාසික අවස්ථාවක් වන අතර එහිදි හිරුගේ තාපය හා විකිරණශීලිභාවය සොයමින් තාරකා නිර්මාණය වූයේ කෙසේද යන්න ගැන පරීක්ෂණ කිරීම නාසා ආයතනයේ මෙම නව මෙහෙයුමේ අරමුණ වී තිබේ.

මෙම මෙහෙයුම ලබන වසරේ ජූලි මාසයේදී දියත් කිරීමට නියමිත අතර කොරෝනා යනුවෙන් හැඳින්වෙන සූර්යාගේ වායුගෝලයට මෙම අභ්‍යාවකාශ යානය යැවීමට නියමිතය. මෙම යානය ‘පාකර් සෝලර් ප්‍රෝබ්’ යනුවෙන් නම් කර තිබේ.

මිනිසුන් රහිත රොබෝ යානයක් මෙලෙස හිරුගේ වායුගෝලය වෙත යැවෙන අතර මෙවැනි මෙහෙයුමක් දියත් කරන පළමු අවස්ථාව ද මෙය වෙයි. සූර්යාගේ මතුපිට සිට සැතපුමි මිලියන 3.9 (කිලෝමීටර මිලියන 6.3ක්) දුරින් පිහිටි කක්ෂය වෙත මෙම යානය යැවෙනු ලැබේ.

මෙම කලාපයේ උෂණ්තවය සෙල්සියස් අංශක 1,377ක් (ෆැරන්හයිට් 2,500) කට ආසන්න වන බව පැවෙසන අතර සූර්යාගේ වායුගෝලය වෙන යැවෙන යානය අඟල් 4.5කින් සමන්විත කාබන් සංයුක්ත පළිහකින් සමන්විත වේ.

සූර්යාගේ වායූගෝලය වෙන යැවෙන මෙම රොබෝ යානය පැයට සැතපුම් 430,000ක වේගයකින් ගමන් කරනු ඇතැයි පැවසෙන අතර එය නිව්යෝක් නුවර සිට ටෝකියෝ වෙත විනාඩියකට අඩු කාලයකින් ගමන් කිරීම හා සමාන වේ. මෙම මෙහෙයුම වසර හතක කාලයක් පුරා දියත් වනු ඇතැයි පැවසේ.