මාස 19 ක් තිස්සේ දිග්ගැස්සෙමින් පවතින සිරියා අර්බුදය අවසන් කිරීමට නම් පළමුවෙන්ම සිරියා රජයත්, කැරැලිකාර පාර්ශ්වයත් අතර සටන් විරාමයක් ආරම්භ විය යුතු බවත් ඉන්පසු එම අර්බුදයට දේශපාලන විසඳුමක් සෙවිය යුතු බවත් සිරියා අර්බුදය විසඳීමට එක්සත් ජාතීන්ගේ සංවිධානය විසින් පත් කළ විශේෂ සාම නියෝජිත ලක්දාර් බ‍්‍රහීම් පවසයි. බ‍්‍රහීම් මේ බව පැවසුවේ පෙරේදා (20) සිරියාවේ ඩමැස්කස් නුවරට පැමිණ සිරියානු විදේශ ඇමැති වලීඞ් මුල්ලේම් හමුවී සාකච්ඡා කළ අවස්ථාවේදීය. ලබන සතියේ යෙදෙන මුස්ලිම් නිවාඩු සති අන්තයේදී එම සටන් විරාමය ආරම්භ කිරීමට කටයුතු කරන්නැයි ද බ‍්‍රහීම් සිරියා රජයෙන් සහ කැරැලිකාර පාර්ශ්වයෙන් ඉල්ලා සිටියේය. මේ අතර සිරියාවේ නගර රැසක ඊයේ (21) දිනයේ ද දරුණු ගැටුම් පැවැතිණි. ඒ අතරින් කැරැලිකරුවන්ගේ ග‍්‍රහණයේ පවතින මාරෙත් අල් නුමාම් නගරය යළි අත් කරගැනීමට රජයේ හමුදා උත්සහ කළ අවස්ථාවේදී සිරියා රජයේ හමුදා සෙබළුන් 43 දෙනෙක් ජීවිතක්ෂයට පත්වූහ. මානව හිමිකම් සුරැකීමේ සංවිධාන පෙන්වා දෙන්නේ සිරියානු අර්බුදය ආරම්භයේ සිට මේ දක්වා රජයට එරෙහිව කටයුතු කළේ යැයි චෝදනා ලැබ ආරක්ෂක අංශ විසින් අත්අඩංගුවට ගනු ලැබූ බොහෝ දෙනකු හිටිහැටියේ අතුරුදන්ව ඇති බවය. අතුරුදන් එම පිරිස 28,000 කට වැඩි බවත් ඔවුන් ඝාතනය කර ඇති බවට සැකයක් පවතින බවත් එම මානව හිමිකම් සුරැකීමේ සංවිධාන වැඩි දුරටත් කියා සිටී. මේ වනවිට ඒ ගැන එක්සත් ජාතීන්ගේ මානව හිමිකම් සුරැකීමේ සංවිධානයේ ද අවධානය යොමු වී ඇතැයි ද වාර්තා වේ.