සාම සාකච්ඡාවලට එන්නැයි තමන් කළ ඇරැයුම ඇෆ්ගන් තලේබාන් සටන්කාමීන් විසින් පිළිගෙන ඇතැයි ඇමෙරිකාව ඊයේ (19) නිවේදනය කළේය.
වසර 12 ක් තිස්සේ දිග්ගැස්සෙමින් පවතින ඇෆ්ගන් යුද්ධය 2014 වසරේ දී නිමා කිරීමට ඇමෙරිකාව ප‍්‍රමුඛ නේටෝව සූදානම් වෙයි. 2014 දී විදෙස් හමුදා ඇෆ්ගනිස්තානයෙන් පිටවී යන්නේ රටේ ආරක්ෂක කටයුතු ඇෆ්ගන් ආරක්ෂක අංශවලට පවරා දෙමිනි.

සාම සාකච්ඡා පවත්වමින් පවතින අර්බුදයට දේශපාලනික විසඳුමක් සෙවීමට ඇමෙරිකා රජය කළ ආරාධනාව තමන් ද පිළිගත් බව කටාර් රාජ්‍යයේ දෝහාහි පිහිටුවා ඇති තලේබාන් සාම කාර්යාලයේ සිටින එම සංවිධානයේ ප‍්‍රකාශක මුහමද් නහීම් පවසා ඇත. නහීම් මේ බව කියා සිටියේ ඊයේ මාධ්‍ය හමුවක් පවත්වමිනි.

නහීම් පැහැදිලි කළ අන්දමට, තලේබාන් සංවිධානය ඇමෙරිකාව කළ එම ආරාධනාව පිළි ගෙන ඇත්තේ, ඇමෙරිකාව විසින් ඉදිරිපත් කරනු ලැබූ කොන්දේසි කිහිපයක් ඉවත් කර ගැනීමෙන් පසුවය.

තලේබාන් සංවිධානය, අල් කයිඩාව සමඟ සම්බන්ධකම් පවත්වන බවත් එම සම්බන්ධකම් වහා නැවැත්විය යුතු බවත් ඒ අතර තිබූ ප‍්‍රධානතම කොන්දේසිය විය. ඇමෙරිකා රාජ්‍ය දෙපාර්තමේන්තුව ප‍්‍රකාශ කළේ තමන් එම කොන්දේසිය ඉවත් කර ගත් බවය.

වසර 12 ක් තිස්සේ පවතින අවි ගැටුම් නිමා කිරීමේ අරමුණින් සාම සාකච්ඡා පැවැත්වීමට මුලින්ම උනන්දු වූයේ ඇෆ්ගන් රජයයි. ඇෆ්ගන් ජනාධිපති හමීඞ් කර්සායි ඒ වෙනුවෙන් සාම මණ්ඩලයක් ද පිහිටුවීය.

අවස්ථා ගණනාවකදී තලේබාන් නියෝජිතයන් සහ ඇෆ්ගන් බලධාරීන් අතර සාකච්ඡා පැවැත් වුවත්, ඒවා අසාර්ථක විය. ඇෆ්ගන් සාම මණ්ඩලයේ

තලෙයිබාන් ප‍්‍රකාශක නහීම් (දකුණේ)

සාමාජිකයෝ ද තලේබාන් ප‍්‍රහාරවලින් ජීවිතක්ෂයට පත්වූහ.

ඉකුත් වසරේ පාකිස්තාන අත්අඩංගුවේ සිටි ඇෆ්ගන් තලේබාන් සිරකරුවන් නිදහස් කිරීමට ඇෆ්ගන් රජය පාකිස්තාන රජය සමඟ එක් වී කටයුතු කළේය. ඒ අනුව ඇෆ්ගන් තලේබාන්වරු සාම සාකච්ඡුා සදහා උනන්දු වූහ.

ඒ අනුව ඔවුන් මේ වසර මුලදී බටහිර සහාය මත කටාර් රාජ්‍යයේ සාම කාර්යාලයක් පිහිටුවීය. සාම සාකච්ඡා පැවැත්වෙනු ඇත්තේ එම කාර්යාලය හරහාය.
මේ වනවිට ඇෆ්ගනිස්තානයේ රතු කුරුස කටයුතු නවතා දැමීමට ජාත්‍යන්තර රතු කුරුස සංවිධාන තීරණය කර ඇත. එම හේතුව නිසා ඇෆ්ගන් වැසියන් බොහෝ දෙනකු ඉමහත් අසීරුතාවකට පත් ව සිටින බව වාර්තා වේ.

රතු කුරුස සංවිධානය එම තීරණය ගෙන ඇත්තේ මීට සති කිහිපයකට පෙර, නැගෙනහිර ඇෆ්ගනිස්තානයේ ජලල්ලාබාද් නුවර පිහිටි ඔවුන්ගේ කාර්යාලයට තලේබාන් සටන්කාමීන් පහර දීම නිසාය.