මහ වැසි හේතුවෙන් සුඩානයේ කර්ටෝම් නුවර සහ ඒ අවට පළාත් රැසක් පෙරේදා (11) ජලයෙන් යටවුණු අතර, හදිසියේ හටගත් ජල ගැලීම්වලට 36 දෙනෙක් බිලිවූහ.

දින ගණනාවක් නොකඩවා ඇද හැළෙන මහ වැසි හේතුවෙන් හදිසියේ හටගත් සැඬ පහර සුනාමියක් සේ කඩා වැදුණු බව සුඩාන පුවත් සේවා වාර්තා කර ඇත.
ජල ගැලීම් හේතුවෙන්, 5,000 කට වැඩි පිරිසකට උන්හිටිතැන් අහිමිවිය. ජලයෙන් විනාශ වූ පැල්පත් ගම්මානය. ගම්මාන 10 ක් මුළුමනින්ම විනාශ වූ බව මාධ්‍ය වාර්තා වැඩි දුරටත් කියා සිටී. සුඩානයට මහ වැසි ඇද හැළීම ආරම්භ වූයේ අගෝස්තු පළමු වැනිදා සිටය.

එක්සත් ජාතීන්ගේ සංවිධානය සහ ජාත්‍යන්තර රතු කුරුස සංවිධානය ප‍්‍රකාශ කළේ විපතට පත්වූවන් වෙනුවෙන් ආධාර ලබා දීම සඳහා තමන් අපි‍්‍රකානු රාජ්‍යයක් වන සුඩාන රජය සමඟ එක් වී කටයුතු කරන බවය.

නිවාස අහිමි වූ ගම් වැසියන් පාසල්වල පිහිටුවූ සරණාගත කඳවුරුවලට වී සිටින බවත් ඔවුන්ට අවශ්‍ය වියළි ආහාර සහ පානීය ජලය ලබා දීමට පියවර ගෙන ඇති බවත් සුඩාන රජය පවසයි. සහනාධාර බෙදා දීමේ කටයුතුවලට හමුදාව යොදවා ඇත.

 

කර්ටෝම් නුවර නිවාස ජලයෙන් යටවී ඇති අයුරු ...