වසර 42 ක් පුරා ලිබියාව පාලනය කළ කර්නල් ගඩාෆි ඝාතනය කිරීමෙන් පසු ලිබියානු අන්තර්වාර රජය ඊයේ (23) සිට සිය රට (ලිබියාව) නිදහස් වූ බව ප‍්‍රකාශයට පත් කිරීමට සූදානමින් සිටියේය.ගඩාෆි විරෝධී කැරැල්ල ඇරඹුණු බෙන්ගාසි නුවර සිට එය ප‍්‍රකාශයට පත් කිරීමට ලිබියානු අන්තර්වාර රජය සැලසුම් කර තිබූ අතර එය ඊයේ (23) පස්වරුවේ නිවේදනය කිරීමට නියමිතව තිබුණි.නිදහසේ ප‍්‍රකාශනය ලෙස එළි දැක්වෙන එම ප‍්‍රකාශනය ලිබියාව නව මඟකට යොමු කිරීමක් බවත්, එමෙන්ම ඉදිරි මාස අටේදී මැතිවරණ පැවැත්වීමට සූදානම් බවත් ලිබියා අන්තර්වාර රජයේ වැඩ බලන අගමැති මහමුද් ජිබ්රිල් කියා සිටී.එරට මහජන ජාතික සම්මේලනය සඳහා මැතිවරණයකින් නියෝජිතයන් පත් කර ගැනීමටත්, එමඟින් අන්තර්වාර රජයක් සහ නව අග‍්‍රාමාත්‍යවරයකු පත් කිරීමටත් නියමිතය. එම අන්තර්වාර රජය විසින් දින 60ක් තුළ නව ව්‍යවස්ථාවක් ද සකස් කිරීමෙන් පසු එම ව්‍යවස්ථාව ජනමත විචාරණයක් සඳහා යොමු කිරීම ජිබ්රිල් ප‍්‍රමුඛ වත්මන් අන්තර්වාර රජයේ පාලකයන්ගේ අරමුණ වී ඇත. එම නව ව්‍යවස්ථාව අනුමත වී මාස හයක් ඇතුළත ලිබියාවේ මහ මැතිවරණය පැවැත්වීමට ද නව පාලකයින් සැලසුම් කර ඇත.කර්නල් ගඩාෆිගේ මරණයත් සමග මාස හයකට ආසන්න කාලයක් තිස්සේ ගඩාෆි පාලනය බිඳ හෙලීමටත්, ලිබියානු ජනතාව ආරක්ෂා කර ගැනීමටත් සක‍්‍රීය දායකත්වය දැක්වූ නේටෝ සංවිධානයද එරට තුළ පවත්වාගෙන ගිය සිය මෙහෙයුම් කටයුතු අවසන් කිරීම කෙරෙහි අවධානය යොමු කර තිබේ.ඒ අනුව මේ මස 31 වැනිදා සිට ලිබියාවේ මෙහෙයුම් කිරීම සම්පූර්ණයෙන්ම නතර කරන බව නේටෝ සංවිධානය අවධාරණය කර සිටී.