යේමන බුද්ධි අංශ මූලස්ථානයට ඊයේ (19) එල්ල වූ අල් කයිඩා ප‍්‍රහාරයකින් එරට ආරක්ෂක අංශ සාමාජිකයෝ 18 දෙනෙක් ජීවිතක්ෂයට පත් වූහ. ප‍්‍රහාරය එල්ල වූයේ යේමනයේ ඒඩන් නුවර පිහිටි බුද්ධි අංශ මූලස්ථානයටය. සටන්කාමීන් මූලස්ථානයට කඩා වැදී ඇත්තේ එය ඉදිරිපිට කාර් බෝම්බයක් ද පුපුරුවා හරිමින්ය. කාර් බෝම්බය පුපුරා යෑමත් සමඟ හටගත් කලබලය මැද සටන්කාමීන් මහල් තුනකින් සමන්විත වූ එම හමුදා මූලස්ථාන ගොඩනැගිල්ලට ඇතුළු වී වෙඩි තැබීමටත් අත්බෝම්බවලින් පහර දීමට පටන් ගෙන ඇත. ප‍්‍රහාරයෙන් මියගිය පිරිස අතර මූලස්ථානයේ ආරක්ෂාවට සිටි ආරක්ෂක නිලධාරීන් සහ හමුදා සෙබළුන් සිටින බව විදෙස් මාධ්‍ය වාර්තා කරයි. ප‍්‍රහාරයෙන් තවත් සෙබළුන් 7 දෙනකු සහ සිවිල් වැසියෝ තිදෙනෙක් තුවාල ලැබූහ. ප‍්‍රහාරය සඳහා අල් කයිඩා සටන්කාමීන් 10 දෙනකුගෙන්  සමන්විත කණ්ඩායමක් පැමිණ ඇති බවත් ඔවුන් අතර මරාගෙන මැරෙන බෝම්බකරුවන් දෙදෙනකු ද සිටි බවත් යේමන ආරක්ෂක අංශ වැඩි දුරටත් කියා සිටී. යේමනයේ ප‍්‍රචණ්ඩ කි‍්‍රයා සිදු කරන්නේ උතුරු අප‍්‍රිකා අර්ධද්වීපයේ කි‍්‍රයාත්මක වන අල් කයිඩා සටන්කාමී සංවිධානයයි. යේමන රජය ඔවුන් සමඟ සටන් කරන්නේ ඇමෙරිකාවේ සහාය ඇතිවය.