ඉදිරියේදී පැවැත්වීමට නියමිත ජනාධිපතිවරණයේ නිදහස හා සාධාරණ බව යන කරුණු අවතක්සේරුවට ලක් කරමින් මාලදිවයිනේ රජය ගන්නා තීරණ සහ ආණ්ඩුවේ ක්‍රියාකලාපය සම්බන්ධයෙන් ඕස්ට්‍රේලියානු රජය දැඩි අවදානයකින් පසුවන බව ශ්‍රී ලංකාව සහ මාලදිවයිනේ ඕස්ට්‍රේලියානු  මහ කොමසාරිස් බ්‍රයිස් හචිසන් මහතා ඉකුත් දා පැවැසීය. 
 
ජූනි 20 සහ 21 දෙදින මාලදිවයිනේ සංචාරයක යෙදෙමින් මහකොමසාරිස් බ්‍රයිස් හචිසන් මහතා එම කරුණු කීවේය.
 
ප්‍රජාතන්ත්‍රවාදයට සහ ප්‍රජාතන්ත්‍රවාදී ආයතනවලට හානි කරමින් මාලදිවයිනේ රජය ගෙන ඇති ක්‍රියාමාර්ග සම්බන්ධයෙන් ඕස්ට්‍රේලියාව දිගින් දිගටම අවධානයෙන් පසුවන බව ද හෙතෙම කීය. 
 
රැස්වීමට ඇති නිදහස, භාෂාණයේ නිදහස මැතිවරණ ක්‍රියාවලියට පූර්ණ වශයෙන් සහභාගී වීමට ඇති අයිතිය සහ නිදහස ඇතුළු මාලදිවයිනේ සියලු වැසියන්ගේ මූලික අයිතිවාසිකම් සහ ඔවුන්ගේ නිදහසට ගෞරව කරමින් කටයුතු කරන්නැයි මාලදිවයිනට අවධාරණය කරන බව මහකොමසාරිස්වරයා එම සංචාරයේදී පැවැසීය. 
 
මැතිවරණ ක්‍රියාවලියේ විශ්වාසනීයත්වය තහවුරු කිරීම උදෙසා දේශපාලන සිරකරුවන් නිදහස් කරන්නැයි ද විපක්ෂයේ ක්‍රියාකාරකම්වලට ඒ සඳහා හිමිවිය යුතු නිදහස ලබාදෙන්නැයි ද ඉල්ලා සිටින බව මහ කොමසාරිස් බ්‍රයිස් හචිසන් කීය. 
 
055