ඇමරිකා ජාතික ඩැරිල් සී ලොව වාසනාවන්තම පුද්ගලයායැයි කීමේ වරදක් නැත.ඒ පැයට සැතපුම් 110 ක වේගයෙන් ගමන් කළ දුම්රියක හැපී වුවද ජීවත් වීමේ වරම ඔහු හිමිකරගෙන ඇති බැවිනි.

චිකාගෝ නුවර දුම්රිය මාර්ගයක ඇවිදිමින් සිට ඇති ඩැරිල් දුම්රියේ ගැටී ඇත්තේ ඔහුගේම නොසැළකිලිමත් බව නිසාය. ඉස් බනුවක් පැළැද ගීත අසමින් ගිය ඔහුට පසුපසින් පැමිණෙමින් තිබූ දුම්රියේ ශබ්දය ඇසී නොමැත.දුම්රියේ කොන්දොස්තරවරයා සදහන් කරන ආකාරයට දුම්රියේ නළාව කිහිපවරක් නාද කළත් අයින් වී ඇත්තේ ඩැරිල් නම් නොවේ.වංගුවක් හෙයින් වේගයද එක්වර අඩු කිරීමට නොහැකි වූ තැන දුම්රිය මාර්ගයේ සිටි පුද්ගලයා දුම්රියේ ගැටෙනවා බලා සිටිනවා හැර වෙන කළ හැක්කක් නොතිබූ බව කොන්දොස්තරවරයා පොලිසිය හමුවේ කියා ඇත.

දුම්රියේ ගැටී අඩි 20 ක් පමණ දුරකට විසිව ඇති ඩැරිල් පතිත වී ඇත්තේ විරුද්ධ පැත්තේ රේල් පාර මතය.වහ වහා රෝහල් ගතකෙරුණු ඩැරිල්ව

සැත්කම් කිහිපයකටම භාජනය කිරීමට වෛද්‍යවරුන්ට සිදුවී ඇත.දැන් ඩැරිල් සිටිනුයේ සුවය ලබමින්ය.

වේගයෙන් ගමන් කළ දුම්රියක ගැටී දිවිබේරාගත් පුද්ගලයෙකු ගැන තමන් මේ අසන ප‍්‍රථම වතාව බව පොලිසිය කියයි.තවද දුම්රිය මාර්ගයන්හි ඇවිදීමට යාමේදී හොද අවධානයෙන් සිටිය යුතු බවත් ඔවුන් අවධාරණය කරයි.ඒ සියලූ දෙනා ඩැරිල් සී තරම් වාසනාවන්තයන් නොවන බැවිනි.